每次經過油麻地我必定去呢間日式料理食佢哋個平靚正嘅下午茶拉麵套餐。其實拉麵我一向麻麻地，因為做得好食嘅唔多，唔係味精湯加拉麵，就係麵唔夠爽口煙韌，總之好求其唔正宗，偶然遇到好食嘅價錢就好貴，有啲甚至過百蚊一碗，對我來講唔值得亦都唔捨得。
食拉麵湯底同麵真係好緊要，個豬骨湯底真係要用大量豬骨淆嘅豬骨濃湯，兼且食完唔會口渴，拉麵要做到食落爽口煙韌，溏心蛋蛋黃要似啫喱咁晶瑩通透，唔會過生或過熟等等……。
嚟到禮三井食下午茶必食三文魚鰭拉麵，三文魚鰭炸得好香脆，入口好香三文魚鮮味又唔乾。拉麵非常出色，入口煙韌，湯底濃郁得嚟唔油膩，真係飲晒成碗都得，飲完重唔會口渴添！雖然係下午茶但係拉麵大大碗同平常一樣，冇因為下午茶特價而細碗咗，三文魚鰭亦都好多件，淨係一碗再配杯飲品都飽。
今次為咗話畀大家知有幾抵食，我就叫咗全餐，除咗三文魚鰭拉麵，重有鰻魚手卷加鹽燒秋刀魚再配金桔檸檬蒟蒻特飲。朋友見到我碗三文魚鰭拉麵咁正都即刻叫返碗嚟食，佢揀咗另一款組合，拉麵加日式餃子再配杯熱飲。除咗拉麵其它食物都有一定嘅水準㗎！
依家到講價錢喇！一碗拉麵+壽司+小食+飲品四樣，再加埋一都只係四十幾蚊咋！抵到呢！平時只係叫一碗拉麵幾平都要幾十蚊，唔好話拉麵，呢個價錢去茶餐廳食個茶餐都唔得啦！而且唔單止平咁簡單，係坐得舒服，食物好食又有質素，大家睇完係咪想即刻去試呢？真係冇介紹錯㗎！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
