上星期六約咗姊妹閨蜜喺荃灣行街兼食飯，剛好兩點半下午茶時間就一齊去olive café 試食佢傳聞中嗰個平價deluxe high tea set。
入到去café環境唔錯，坐位舒適，燈光暗得嚟好柔和，適合三五知己或同閨蜜共聚。坐低嘅時候侍應話下午茶餐三點半先至開始， 我同個friend就叫咗一個lunch set兩個人分，加即磨咖啡傾住計食住等。Lunch set我哋叫咗黑松露帶子意大利飯，意大利飯好正宗，入口creamy得來有咬口，唔似好多餐廳做得過份淋同濕，即磨咖啡都唔錯，我同個friend都係飲齋啡嘅，覺得佢入口都幾順喉。
三點半一到侍應就先問我飲邊款茶？我一揀就揀咗鍾意嘅水果茶，水果茶好香甜仲可以無限添加，我見到佢裏面嘅水果粒已經切到好細粒，應該係想人倒茶嘅時候可以倒出嚟都幾細心。不過美中不足係有啲生果，例如藍莓大粒過壺嘴，倒到出嚟嘅時候都會塞住仲會漏啲茶出嚟，所以建議大家先將生果用匙羹潷起放喺杯，再倒茶就穩陣啦。
三層下午茶鹹點有芝士火腿牛角包、炸雞翼、同吞拿魚三文治， 雞翼炸得香脆，牛角包芝士半溶，吞拿魚三文治嘅麵包就烘得唔夠。中間一層係蘋果金寶同兩款是日蛋糕，蘋果金寶係即焗嘅，好香肉桂味幾有特色，當日兩款是日蛋糕分別係紐約芝士同特濃朱古力，芝士蛋糕芝士味濃不過唔夠硬身，而特濃朱古力蛋糕除咗朱古力味濃仲好軟滑。最後頂層就係提子鬆餅同迷你鮮果撻，鮮果撻撻底都幾脆，提子鬆餅就麻麻地比較甜而且唔夠鬆化。個tea set整體味道唔錯，重點係價錢平，198蚊係包兩位呀！呢個價錢有咁嘅質素係正㗎！
由於餐廳環境舒服，我同個friend唔經唔覺由兩點幾傾到六點幾，足足坐咗四個鐘，期間侍應仲一直幫我哋加水果茶添！平時去Starbucks一杯咖啡一件蛋糕都差唔多100蚊，坐得又唔係幾舒服，呢度每人百零蚊就可以悠閒歎足一個下晝，真係平靚正㗎！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
