香港首間熊本熊x味千主題拉麵館嚟咗荃灣喇！熊本熊同味千都係來自熊本，兩個friend聚頭一齊介紹拉麵美食，就等我米芝Gi去試吓先啦！
同其它主題餐廳唔同嘅係佢唔係好多主題裝飾，門口一隻大嘅熊本熊捧住碗拉麵企喺度，右手邊就係味千妹，麵館裏面、牆上同椅背有少少熊本熊裝飾，值得讚嘅係佢樓底好高，傾計大聲啲都唔會覺得嘈。
坐底揀咗個2人套餐，百幾蚊包兩個拉麵、兩款小食、兩杯飲品都幾抵，裏面有豬頸肉軟骨拉麵、和風肥牛拉麵、栗子薯天婦羅、烏賊磯邊揚，飲品選擇唔多，我揀咗熱柚子蜜，仲另外加多個小食吉列炸蝦，同叫多杯凍芒果汁。豬頸肉好薄不過幾軟腍，豬軟骨都ok，豬骨湯底唔錯唔會好鹹，鍾意飲湯嘅朋友連湯都飲埋，拉麵口感煙韌，最鍾意隻糖心蛋真係好滑好流心。仲有栗子薯天婦羅，栗子蓉好甜好好味呀！烏賊磯邊揚就麻麻地，炸粉厚而且烏賊係乾魷嚟，另外炸蝦炸得好金黃冇多餘嘅油唔錯。至於肥牛係個friend食嘅，佢話ok唔錯喎！嗰杯芒果汁就假假地，咁十幾蚊又真係冇可能係鮮榨果汁囉！
由於店好大，坐足兩個鐘都唔怕因為有人等位而要急急走，侍應服務態度都好好，要斟茶加水攞碗都即叫即應即遞上。今次食味千同以前食嘅感覺完全唔一樣，以前覺得好重味精、服務一般，今次有驚喜，抵讚！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
