人人去迪士尼樂園都為入園玩， 我比較另類。到迪士尼我鍾意去迪士尼酒店晶荷軒飲茶。
大家都知道香港迪士尼酒店好靚，有歐陸式嘅華麗風格， 而一到晶荷軒門口，就會見到由好多朵水晶蓮花砌成嘅牆，入到去望上去好多盞大大嘅荷花燈好有特色，高雅而不俗氣。
餐廳內枱與枱之間好寬闊，樓底好高，所以點傾計都唔會覺得嘈。最貼心嘅係近路口嘅坐位椅背會特別高，好似屏風咁遮擋住避免人來人往令食客受到干擾。咁細心，明顯裝修上落咗好多心機。餐廳仲有落地玻璃一望出去就係花園迷宮同碼頭，風景賞心悅目。
去到一定要食特色點心。特色點心可於24小時前預訂，我訂咗有雞丁蓮蓉包、米奇煎薄餅、星球大戰金腿伍仁餅、Duffy 豆蓉包、蠔汁叉燒豬仔包、三眼仔菜肉包、大眼仔雞包仔、米奇鴛鴦糕同米奇芒果布甸，仲有皇牌點心——手雕花嘅金魚蝦餃「如魚得水」添！
造型精美嘅迪士尼人物特色點心真係見到未食先興奮，睇見都開心！除咗那個金腿五仁餅超甜、味道怪、唔好食之外，其它都好食㗎！
如魚得水個金魚蝦餃好好食、好彈牙，手工真係好靚呀！不過要提一提大家相機先食就要快，因為啲包凍咗就會變得韌，就唔好食㗎喇！
雖然晶荷軒飲茶唔平，但係對自己好啲，間中都可以豪一次。如果你有樂園嘅「奇妙處處通全年證」係會有折嘅！著靚啲飲完茶之後，出面大把影相位。其實入迪士尼唔一定要入園玩，著得靚靚，舒舒服服喺酒店都夠大家玩足半日，瘋狂影相又得，老友茶聚又得，重點係酒店內全天侯冷氣又舒服，大人細路都會鍾意。◇
新到港日本零食
呢款日本傳統服飾公仔造型嘅抹茶朱古力，牛奶味比較濃不過都仍有淡淡抹茶味，出奇地佢唔係好甜， 朱古力最怕就係太甜死甜， 鍾意朱古力嘅朋友嚟緊12月24至28號去美食展的話見到不妨去買嚟試吓！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。
如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
