【米芝Gi周記】華麗矜貴 Air Floating Afternoon Tea Set

米芝Gi講食

最近MO Bar推出咗個超華麗嘅Air Floating Afternoon Tea Set，剛好朋友生日，立刻畀自己個藉口去食好啲，醒目嘅我兩個星期前打去先訂定個好位置（Window Seat）。

呢個Tea Set一上嚟，Wow！靚到嘩嘩聲，大大個氣球連住2層靚靚精緻嘅美點，貼心嘅侍應幫我哋先影一張即影即有相送俾我生日嘅朋友，再提我哋鬆餅要趁熱食，港女嘛當然係相機先食啦，相機先食是常識吧！

甜品靚到似藝術品。

先來一口最愛嘅伯爵茶，懷住興奮又忐忑嘅心情開始食，點解咁講呢？大家知道食物賣相同味道往往都係成反比嘅，通常越精緻越中伏，我都唔知中伏過幾多次喇！不過MO Bar始終係文華東方嘅，即使差極都應該有個譜。鬆餅一如以往咁鬆化好食，雖然冇佢最出名嘅玫瑰果醬，換上咗黑加侖子醬，一試即愛上，入口濃濃嘅黑加侖子果香好新鮮超開胃絕對唔同一般嘅果醬咁假又死甜，即刻將另外嘅柑橘果醬同clotted cream 比下去，女仔一定鍾意。

好可愛的桔仔造型。

鹹點全部都ok好食，先食雞肉吉列豬扒漢堡，麵包係墨魚汁做的，雞肉同吉列豬扒出奇地夾，再來三文魚沙律法包，麵包好脆，不過呢款好大路冇咩特別，鵝肝醬好新鮮，車打芝士很濃，最驚喜就係食到其中一個味道好似食咗個花園一樣，真係冇誇張，真係呢個感覺，真係好似吞咗成個花園落肚，幾清新好特別。

先來一口最愛的伯爵茶。

「登登登登……」，到甜點喇，件件都靚到藝術品咁，先來個可愛桔仔造型嘅，桔仔皮係dark chocolate嚟，入口流心嘅酸酸甜甜夾雜住橙柑果肉，超好食，太美味!之後食玻璃瓶嗰個，黃色是蛋糕碎下邊是梨子mousse但又比mousse流質啲又係酸酸咁，呢個就麻麻哋，再來紅色嘅係紅莓蛋糕，另一款係下邊係朱古力抹茶上邊黃色球裏面亦係酸微微嘅流心柚子mousse，最後食上面朱古力花長筒型puff嗰款入口好似雞蛋仔咁味道啲皮又有啲韌，味道好怪唔好食。

Afternoon Tea Set嚟講呢個係好食嘅，雖然比一般Tea set貴。呢個Tea set每枱都會送一張即影即有相，如有朋友生日記得訂位嘅時候講埋，有寫上生日朋友名字嘅朱古力棉花糖送的。◇

鹹點全部都ok好食。

潮流資訊

試用人氣日本越冬霜

超人氣的日本越冬霜。

天氣開始乾燥，塊面好乾，剛好之前經網上代購訂嘅人氣日本限定「Beehoney越冬霜」到手，立即試用。先講佢有幾巴閉，佢係日本COSME No.1 受賞美容產品，日本一年只賣一次，每年呢個時候限量發售，今年係第四年賣，年年熱賣，好多人用過都讚。我咁留意市場資訊，梗係唔執輸，即刻訂黎試下，睇下係咪真係咁正啦！我只搶到2盒。

越冬霜含有高濃度蜂蜜、蜂王漿、蜂蠟、低分子膠原蛋白及透明質酸等高保濕成份。稱可深入角質層加強保濕效果，而且不油膩快吸收，肌膚水嫩有光澤。咁天然成份售價竟然只係百零蚊港紙（仲要係代購價經已貴了），呢個先最最吸引，難怪吸引到好多人瘋搶。
講到咁好到我試用喇～打開聞到淡淡天然蜂蜜香味，cream幾滑，上面好易推，不過上面後我覺得笠，可能我用份量多咗，每次搽少少就夠。佢用途多多，除咗當臉霜用，可厚搽做臉膜，敷完把多餘嘅抹走，可搽身、搽手、搽頸，唔浪費。

總括嚟講，冇佢講得咁正，但呢個價錢有咁嘅質素，係物超所值，難怪人氣高企。◇