【股壇野馬】挾完再落，散戶穿頭

大名

星期一皆大歡喜，全世界都升，就差多定少，散戶話大當家出行，點都升幾日市示下威；點知星期二就一棍打落去，香港高開少少，上晝越升越有，飯後再俾個即日高位，散戶真係執輸行遲慘過敗家，驚死蝕底跳入去，點知個個穿頭。香港個市反正21,800係阻力位，過唔到四百零五百點都唔叫企穩，打死唔入市。美國又點呢？歷史話我地知，大選前都一定會有人維持秩序，大落無份，橫行居多，經濟真係差到無朋友就搵仗打轉移視線。杜指今年每次16,000點都彈，心照。阿爺個市唔好玩，到3,000點就彈，3,200點就回，做到個市好似見底咁樣，但係升就挾銀行，保險同兩桶油，跌就遍地屍骸，成交又唔夠，搵鬼同你玩（ 星期一真係傳好快滬倫通，拖到鬼佬落水就抽上去 ）。歐洲又要睇翻希臘，大選完又係齊普拉斯坐正，賣完國民豬仔重可以有得撈，點到你唔服。日後又玩激進手段就嚇死街坊。有一點要留意，星期二歐洲盤時段，有人大手沽人民幣買美元，邊個做？唔會係中資，大老闆出差就搞事，搏乜？陰謀論，美國唔加息，歐元貶唔落，歐洲年尾救出口無望，點好？中國領導人剛話人民幣唔會長時間貶值，咁就正啦，沽貨有人頂，沽個好價錢買美金，預先為加息做對沖，又變相將歐元貶值，兩全其美；如果10月底前都不斷出現呢種沽盤就小心，以防人民幣再一次走弱引起股市大跌。

永達汽車3669，主流業務係內地汽車經銷，目前代理大約20個汽車品牌，4S門店分佈全國17省、55個市共超過200間。剛公佈的行業數據顯示自04年開始，差不多每隔4年就出現一次行業整合和調整；加上今年上半年接近九成的經銷商面臨虧損。有分析員更認為現階段的中國車市正處於整合期，一些近年才進入市場想分一杯羹或者過度擴張的4S店在未來一段時間將出現倒閉潮。商會秘書長更預期未來全國可能有近30%的經銷商倒閉，按現有的兩萬家4S店作為基數，估計要倒閉的數量將達6,000家，當中能留下來的大部份是經營多年或者作風穩健的4S店。永達汽車今年上半年收入約168億元，同比增長12%，純利約3.6億元，同比增長5.3%，從數字上猜到，純利增幅較少的原因不離減價速銷或者經營成本上升。為了提升純利率，改善業績表現，集團積極開拓毛利高的獨立售後服務和汽車金融等業務。業內人士認為，在互聯網的推動下，將來賣車會出現類似直銷模式，永達和阿里巴巴合作開設車碼頭就已經係直銷雛型，但當呢種銷售方式漸成主流後，生產商就可以直接和電商平台合作，經銷商就無位企，最後受害都係自己。如果短期無任何新業務開展，國內持續經濟低迷，估計股價反彈到4.0附近就行人止步，下面支持位2.3附近，有貨走得快好世界。

下星期講隻輝山乳業6863

讀者有任何交流的，可以發電郵至 fundsniper@yeah.net，大家多作交流。（ 以上觀點僅為個人對市場的看法，並非任何投資勸誘或建議。）◇