facebook 熱議

 潘小濤

這是一位同行的經歷，其實也有不少發生在我身上。想來唏噓，每一條新聞，其實背後有多少血與汗呀！

初畢業，講緊19幾年前，保險經紀撩我買意外保險，填報職業係記者，佢返公司查過，要加保費。

我同佢拗，我唔係做突發，只係做政治，即係聽下立法會，跟下港督特首四圍行咋喎，危險性唔大架。

保險公司確實好識計數。

入行時點都無諗過，做政治新聞會比五毛批鬥，甚至比人斬。

聽聞，會計師好怕返內地核數，因為隨時會招殺生之禍。今時今日，民企橫行，黑金氾濫，我估，香港財經界好快都成為高危行業。

新聞言論自由，唔係一件好高尚嘅事，只係一件好基本嘅事。就如陽光與空氣，意思唔係已經習慣，而係無咗會好大鑊。當霧霾罩香江，對邊個都無好處。

今時今日，有好多人仲以為，自己靠啱邊，唔會整到自己，可以詐訓扮時運高當睇唔到，甚至幫主子去整人。

但我想講，你整嘅唔係為主子勇猛殺敵，而係幫一班想渾水摸魚嘅人，為咗私利而破壞去一個健全體制。

活生生例子，吔叔惜日在發牌公聽會上如何威風，今日又如何？

我相信香港公務員、紀律部隊，仍然非常珍惜香港健全制度，就如內地海關早前越境執法，香港警方依然會企硬。捍衛一個制度，要全方位，互相支援。

捍衛制度，除咗遊行，仲要每日緊守崗位，克盡己職，追求卓越，唔好楂流攤。喺崗位上日日和稀泥，盲衝直撞，崗位比人攝咗，遊行多幾多次都補唔返。

最後我想講，我爛命一條，如果有一日，真係有人想拿，唔該成條拿去，唔好剩返半條比我。