久不久我就會走入大埔墟熟食中心食早餐，大埔墟熟食中心裏面三十幾檔食店，大部分都係以前舊墟大排檔搬過去，幾十年嘅老街坊亦係由舊墟跟到去而家大埔墟街市2樓嘅熟食中心。雖然對我嚟講，入去真係山長水遠之餘，仲要早到先有好嘢食，但係我仍然好鍾意去呢度食嘢。除咗為美食，更為咗尋回昔日嗰份同老街坊暢聚嘅香港情懷，享受久違了嘅人情味！
「早起的鳥兒有蟲吃」，呢句話真係好適合形容呢度嘅食店，皆因裏面好多食店每日新鮮製造，只有一定數量嘢食，賣完就會收，所以想食一定要早。我每次都係朝早七、八點就去到，一大早裏面已經坐滿晒老街坊好熱鬧，大家見到面就互打招呼，熟絡到嘻嘻哈哈，食店嘅老闆同員工滿場飛，同街坊食客打成一片，全部都蓮子蓉咁嘅笑容好融洽。即使好似我呢啲唔係成日去嘅人，佢哋都熱情招待，任何人去到都會畀佢哋嘅熱情感染。
今次我先走去林記點心坐底嘆杯茶，食幾碟點心，伙記阿姨熱情開茶仲幫我斟茶添！又一直問我想食咩，幫我去攞，見我影相重話隨便影，又介紹邊樣特色好食，熱情到不得了，當我攞嘅時候，佢怕點心太熱我拎唔到，重一直等我揀完幫我攞返埋位，真係好到呢…！
我要咗即拉叉燒腸、排骨同埋傳統嘅鵪鶉蛋燒賣，鵪鶉蛋燒賣蛋下面嘅豬肉燒賣好香濃嘅豬肉鮮味，排骨亦係好傳統懷舊嘅味道，即拉叉燒腸一樣咁新鮮。
由於我要試其它舖嘅嘢，所以食咗呢幾樣就埋單，三樣點心加兩個茶位埋單都只係44蚊。非常平民地道嘅價錢，重點真係新鮮好食，埋單嘅時候老闆娘梁太都出來招呼，友善到不得了，唔係要帶朋友試食其它嘢，真係坐落都捨得咁快走呀！
到東記喇～去得東記梗係食佢最出名嘅炸豬扒上海麵啦，東記嘅炸豬扒出名大大塊咬落鮮嫩鬆軟，皆因每塊豬扒都係用人手揼鬆，再蘸上炸漿炸至金黃鬆脆。而且主動剪碎上好貼心，真係件件都係心血。自製炸醬夠辣夠香口，配埋上海粗麵味道一流。
豬扒麵大大碗，即使男士一碗一定飽。佢嘅炸雞翼一樣出色，同樣係即叫即炸，我見好多人柯打外賣帶走，返屋企慢慢歎。
最後過埋蘇記食佢嘅特製西多士，口感似家庭feel嘅蛋煎西多士，唔似平時食到嘅炸到整件西多士都係油，少左油膩感，唔用糖漿改落煉奶，而西多士中間亦有夾心令口感豐富啲，佢哋自家製嘅西多士已經五十幾年歷史㗎喇！配埋杯奶茶真係好滿足。老闆又係連街坊點稱呼都記得一清二楚。呢度真係周圍都係老街坊，啖啖都係人情味。◇
地址：大埔墟街市及熟食中心2樓
林記點心 CFS08&CFS09
東記上海麵 CFS27
蘇記 CFS37
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
