【股壇野馬】重蹈覆轍，神仙難救

大名

阿爺連LEGO都玩埋，新鮮出爐LEGOLAND落地上海，加埋之前迪士尼同環球影城，呢幾年大興土木，似唔似09年4萬億救市喎! 當年救市都話民生受惠，衰極都有條高速公路用下；而家搞收費公園，對象都係D情侶或者一家大細，入場費唔會平俾你，維修保養同營運成本又高；加上呢種主題公園去完一次有排都唔會再去，幾時返本已經係問題，講到賺錢就（答唔到）？刺激消費又唔得，睇怕支撐未來幾年GDP都係靠佢（搞基建實俾人鬧）。場外margin又重現5倍高槓桿，分分鐘又整劑斬倉驚魂，香港無辜辜俾阿爺拖埋落水，真係多謝曬。A股蟹貨重災區3,500－3,800點，又問點解？之前散仔信阿媽救市，義無反顧咁跳入去，結果三個字講曬，賣豬仔；散仔跟住又諗十八屆五中全會之前點都會抽一轉，sorry，又讓你失望。美國高官又出聲話今年應該要加息，一時一樣，唔信好過信，但有一樣要小心，美國D公司債開始有人沽空，好彩數目唔大。歐洲好似風平浪靜，DAX就好似有見頂跡象，期權亦開始有人落飛做淡。香港又係無運行，似模似樣衝23,000，點知又係到一到就無貨賣，樓下好多牛仔街貨，莊家點會咁易俾散戶賺錢落袋；樓價開始有下行趨勢，銀行估唔足價已經唔係新聞，遠期港匯沽盤又重現江湖，跌浪隨時一觸即發，今年搵食艱難，少D貨唔會蝕底。

今期隻女人股維珍妮2199，呢隻剛上無幾耐，公司本身為全球數一數二的內衣製造商，IPO時已經叫老友入飛抽籤。點解？淨係主要客戶名單就引死人，其中Victoria's Secret（曾經有人講，一個女人一世人點都要有一件La Perla同Victoria's Secret），Maidenform（歐美為主要市場，亞洲人無幾多個夠料著），Under Armour（個人最愛運動服裝品牌之一）就夠吸引，加上好似Adidas, CK, Reebok呢D品牌，業務範圍遍佈全世界，共通點係走高端路線同功能型產品，經濟環境對業績影響較少。Victoria's Secret母公司L Brand在IPO階段亦是其中一名基石投資者，證明維珍妮的前景連客戶都認同和看好。公司2014-15業績還好，接近42億營銷額，約24%毛利率和8%純利率，其中Victoria's Secret去年開始發展中國市場，Under Armour亦漸漸在國內走紅，預計來自這兩個品牌的訂單在未來會因此而大幅增加（最近幾次經過Victoria's Secret國內專門店先發覺女人的非一般購買力）。公司上市集資所得主要用於擴建越南廠房，即係話將會受惠於TPP，再加上人民幣貶值亦有利公司降低成本，進一步提高利潤。市盈率大約22倍，現價6.50附近，保守估計今年純利最少有40%增長，一年目標價10元。

下星期又講隻天喔國際1219。

讀者有任何交流的，可以發電郵至 fundsniper@yeah.net，大家多作交流。（ 以上觀點僅為個人對市場的看法，並非任何投資勸誘或建議。）◇