「生蟲拐杖」，「竹織鵝」，「馬騮升官」，「賣布唔帶尺」，「番鬼婆大肚」，「曬菲林」。「交通燈」，「山草藥」，「閻王貼告示」。「掘尾龍拜山」，「十二點半鐘」，「冇尾燒豬」，「茶瓜送飯」。「大肚婆行鋼線」，「雷公劈豆腐」，「阿茂整餅」，「年三十晚謝灶」，「豉油撈飯」，「阿婆食粥」，「笑騎騎」，「鱷魚上岸」攪修例，香港人就「壽星公都有license」！
如果通過，大家就「老婆打傘」「老公撥扇」。更「大石砸死蟹」「火燒石灰船」，「白鱔上沙灘」。到時「秀才遇著兵」，「肉到老虎口」，大家「盲人食湯圓」，「啞子食黃蓮」，「鹹蛋滾湯」，「鼻哥窿擔遮」。既然一切「寡母婆死仔」，人民「亞聾送殯」，惟有「肥佬著笠衫」，「阿超著褲」，出來遊行。
修例「神台貓屎」，「屎坑三姑」，「閻王爺嫁女」。「投石落屎坑」，攪出「濕水棉花」，「扁鼻佬戴眼鏡」，「飛機運茶壺」「神仙放屁」的百萬大遊行。老闆「道士剃頭」，「灶君老爺」，「忽必烈」，「陳年中草藥」，「石地堂鐵掃把」，「棺材舖拜神」開槍鎮壓。還「問米婆上身」，「老虎戴念珠」「流鱷魚眼淚」，想遊行人士「宋三個細佬」。大家「十二叔賣狗」，「爛氣球」，「芋頭點糖」，「小偷被狗咬」，「包青天斷案」，「炮仗頸」，就「羅漢請觀音」，「白糖炒涼瓜」再有二百萬人遊行「龍舟棍」。
修例終於「陸文庭睇相」，之前「大佬倌上台」「一個人行晒仲隘窄」，現在「烏雞啄烏豆」大「護照照片」，「床底斬柴」，「水浸眼眉」，「深海石斑」，「挖肉攞瘡生」。人「屎坑石頭」，「白鴿眼」，「木頭眼鏡」，「半夜鵝啼」，「冇耳茶煲」，「石馬無能」，「閻王殿大罷工」。其實「三行佬做門」，何必做「非洲和尚」「老鼠搵貓」？還要「死鵝撐飯蓋」，「豬八戒照鏡」，「橋上倒涼茶」？
當然「法老王個妹」「狗上瓦桁」，但今次「幡桿燈籠」，「雞食放光蟲」，「偷雞唔到蝕渣米」，「秀才手巾」，「孔子搬家」，「擔沙填海」「竹籃打水」。一班「無牙佬飲湯」，「潮州音樂」，「三元宮土地」「滾水淥豬腸」，「棚尾拉箱」，「酒樓點心車」，當下屬「牙籤大少」，「大水沖了龍王廟」，都成為「隔年通勝」「老舉埋年結」，真係「屎忽窿生瘡」，「閻羅王請人」，「閻羅王探病」。
現在「阿陀瞓棺材」「城頭上跑馬」，「呃鬼食豆腐」，「賣魚佬沖涼」，「喃嘸佬跌落屎坑」，「三腳凳」，「蕃薯跌落灶」「枱棺材甩褲」，「阿蘭嫁阿瑞」，「田雞過河」，想「阿崩養貓」？只因當初「馬騮生臭狐」，「關門燒炮仗」，其實為名為利，自己都「杉木靈牌」，「水底屙尿」「除褲放屁」，「泥菩薩過江」，「木匠戴枷」，「阿崩吹簫」，大家都係「灶君上天」：「禮義廉」「殯儀館大減價」！
解讀
靠唔住，無心肝，唔係人咁品，存心不良，心懷鬼胎，唔見得光。點紅點綠，噏得就噏，鬼話連篇。攪風攪雨，指天督地，唔慌好事，好人有限。鋌而走險，揾軟嘅嚟蝦，無果樣整個樣，好做唔做，整色整水，無恥下流放毐蛇，來者不善攪修例，香港人就有排受！
如果通過，大家就陰公淒涼，更冇聲出冇得救，唔死一身潺。到時有理說不清，一去無回頭，大家心中數，有苦自己知，心都實晒，避無可避。既然一切冇指望，人民唔聽佢支死人笛，惟有幾大就幾大，焗住上，出來遊行。
修例神憎鬼厭，易請難送，搵鬼要。激起公憤，攪出無得彈無得頂，高水平非同凡響的百萬大遊行。老闆無計，黑口黑面，屎窟開花，發爛渣，硬鬥硬，想人死開槍鎮壓。還得把死人聲，扮好人假慈悲，想遊行人士送死。大家冇得揀，吹你唔漲，心淡，暗啞底死忍，無得傾，唔爆唔安樂，就人多好擔當，同甘共苦再有二百萬人遊行頂衰神。
修例終於唔衰攞嚟衰，之前系威系勢太霸道，現在烏啄啄大出洋相，撞晒大板，唔知死，好瘀，自討苦吃。人又臭又硬、望高唔望低，睇唔透，唔知醜，得把口，枉自大，無鬼用。其實做人過得自己過得人，何必做乞人憎攞嚟衰？還要死撐，兩面不是人，何苦？
當然發老姣有條路，但今次照遠唔照近，心知肚明，蝕晒大本，包輸，全輸，白費心機一場空。一班下流無恥，自己顧自己，錫身兩頭縮，暗中走人，左推油推，當下屬用完即棄，一家人不認一家人，都成為唔值錢算「x」數，真係無眼睇，搵鬼黎做，問你死未？
現在死都唔掂一味兜圈，鬼都唔信，無晒聲氣，無晒符，坐唔穏，該煨失禮死人，累鬥累，各有各撐。想轉性？只因當初性格偏激唔係人咁味，自我封閉害自己。其實為名為利，自己都不能作主，自知多此一舉，自身難保，自作自受，離晒譜，大家都係有個句講個句：無恥抵死！◇
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
