其實我好鍾意食海鮮㗎！但係海鮮真係名副其實嘅海鮮價，搵唔啱地方食嘅話好容易又貴又唔好食，或者被人當水魚咁劏，最近朋友食過一間大排檔全蟹宴話超好食叫我一定要去試。我一聽覺得好有趣，好少喺大排檔食海鮮嘅我即刻約埋朋友去試下！
呢間手工私房鍋個名好特別叫鱻潮，真係一下被佢考起唔識讀，最後要問個侍應先知「鱻」同新鮮個「鮮」同音，食餐飯都學到嘢真係有得著，哈！呢間舖雖然係大排檔，但係佢用木板同隔離嘅大排檔隔開，好似大排檔中的一間舖仔咁，面積唔大只有唔夠十張枱。坐低見到幾枱食客都係食火鍋，佢個鍋好特別兩邊都係龍頭，好特色，我第一次見，不過今次我係為試佢個全蟹宴而嚟。
佢有幾個套餐，我一行三人叫咗兩個全蟹宴，每個全蟹宴包凍蟹一隻（每位1隻）、松葉蟹腿蒸蛋（每位1份）、炸軟殼蟹（每位1隻）、日式甲羅燒（蟹+鮑魚或聖子）、鹽焗∕清蒸奄仔蟹（兩位1隻）、星洲胡椒蟹∕咖喱蟹（兩位1隻）、鮮蟹粥（人頭份量）。另外再加一個黃金軟殼蟹。
首先上嚟嘅係凍蟹，蟹唔係好大隻但係好鮮甜。日式甲羅燒，我揀咗鮑魚，侍應即時喺我哋面前燒鮑魚，重有一個蟹蓋裏面有蟹膏、蟹子、一隻雞蛋同埋蟹柳，燒緊嘅時候蟹膏嘅香味一邊傳出嚟真係令人食指大動，燒完上枱時侍應細心同我哋講要趁熱食。一啖放入口，嘩！不得了，濃郁甘香嘅蟹膏充滿整個口腔，實在太美味了！反而鮑魚就食唔到鮑魚味。
松葉蟹腿蒸蛋係大路嘢，跟住到炸軟殼蟹，炸軟殼蟹用七味粉拌碟，軟殼蟹外脆內軟入口唔會成口油，好食！奄仔蟹我哋揀咗清蒸，要知道一間食肆嘅海鮮新唔新鮮一定係揀清蒸，上枱嘅時候見到唔係好大隻，但係拆開好多膏，蟹肉鮮甜蟹膏夠香肉結實，真係好新鮮！
另外我哋揀咗星洲胡椒蟹，店家稱係用菲律賓肉蟹，見到隻蟹真係有足一斤重，蟹螯都幾大隻㗎，蟹入口充滿胡椒香，蟹肉好結實最重要係好鮮甜，基本上食完呢幾樣已經幾飽肚。最後上嘅蟹粥裏面有兩隻細蟹，真係要特別讚一讚呢一個蟹粥，佢粥幾軟綿而且無味精，雖然係細蟹但唔係水蟹，肉質一樣結實，另外再讚嘅就係相信大家有食過蟹粥嘅都知道，一向食蟹粥蟹蓋裏面嘅膏早已經冇曬得返空殼，但係呢度嘅仍然穩穩喺蟹蓋裏面，好好食！
最後就係我另外加嘅黃金軟殼蟹，外脆內軟嘅軟殼蟹入口充滿鹹蛋香，唔需要剝殼真係啖啖肉，好味到唔停得口，減肥？真係放埋一邊先啦！
估唔到大排檔裏面竟然有呢一個全蟹宴。價錢方面，我哋去到過咗九點半每位＄298免加一，每人重可以加＄28任食40款火鍋配料添～但怕食唔到咁多所以我哋冇加火鍋。優惠期去到月底，錯過咗就要等下次。唔係賣廣告，佢味道真係好過好多酒樓，而且價錢合理，鍾意食蟹嘅朋友唔好錯過！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
