上星期五約咗朋友去澳門行吓，我好多年冇去過澳門啦。澳門其實大街小巷都有好多美食，可惜天公不造美，去兩日落足兩日雨，第一日仲係大雷雨添，落船出咗碼頭後出面周圍都水浸，真係寸步難行。雖然食唔到街邊小食但係仍然冇阻我搵好嘢食嘅心情。
去咗住處放低行裝，等細雨啲就即刻坐的士去我逢到澳門都必去嘅沙利文餐廳，呢間餐廳已經有50幾年歷史，門口貼有好多獎章，內部嘅裝修依然保持住葡式裝潢風格，木製嘅樓梯、典雅嘅吊燈同餐具，都畀人一種古典嘅感覺。多年嚟裏面侍應嘅服務都一樣咁好，全部都溫和友善。每一個細節，小至斟水同上餐嘅動作，你都會感受到佢哋受過餐桌禮儀嘅訓練，都係優雅嘅。
每次到沙利文我必食佢哋嘅扒大蝦（扒大蝦每日價錢唔同，視乎來價同重量）、周打魚湯同木糠布甸。雖然隔咗幾年，今次我仍然點咗呢三樣，加葡國雞同炒雜菜。留意佢枱上面會有一支水係收錢嘅，侍應會問你需唔需要，唔需要嘅話，佢會另外斟水畀你。
先上嚟嘅係周打魚湯同熱辣辣嘅豬仔包，豬仔包烘得好香脆，入口外脆內軟同依家餐廳嘅餐包完全唔一樣，好食到我哋每人食完一個覺得唔夠喉，侍應仲送多兩個畀我哋，真係好大方㗎！周打魚湯做得好傳統，裏面除咗有周打魚肉，重有蜆肉、薯仔粒同紅蘿蔔粒，除咗飲點麵包都好食。
跟住上嚟嘅係扒大蝦，扒大蝦今次同以前唔同，以前係鐵板上，依家係碟上，但一樣燒得香脆油份充足，大蝦一如以往蝦肉爽口彈牙，食到好多蝦膏，連蝦殼都好入味想吞埋落肚添呀！
再嚟就係葡國雞，葡國雞係傳統葡式焗製，同香港改良咗，好重椰奶味嘅葡國雞完全唔一樣，葡國雞不論配飯或者配豬仔包都好味㗎！蒜蓉炒雜菜就冇咩特別。
最後上嘅木糠布甸同以前嘅水準一樣冇變，木糠布甸上枱時有一定冰度，入口好似食緊雪糕一樣嘅感覺，口感綿密軟滑混合餅乾粉末層次分明，甜度適中，簡直係呢餐完美嘅落幕！
侍應喺我哋影相嘅時候都好配合好友善，臨走嘅時候仲提醒我哋攞齊嘢，真係食物同服務都有質素㗎！◇
沙利文餐廳
地址：澳門南灣大馬路512號
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
