近排天氣持續地凍，上星期六同班朋友一齊去佐敦大鍋口海鮮火鍋店打邊爐，大鍋口一向都好難book位，天氣凍就更加爆場，所以早兩個星期我就已經打去book定位。
任食界來講大鍋口算係平靚正，價錢合理，食物質素唔錯，啲嘢幾好食。種類又多，最重要係劃幾多真係嚟幾多，大家食過任食餐又好，放題又好都會有個經驗，就係劃十樣嚟得五樣，呢一間一定唔會。而且時間都算長，坐低任飲任食2.5小時。
佢淨係湯底已經超過十款可選擇，調味醬油配料亦有好多款。食物款式可以話應有盡有，除咗一般丸類仲有成本比較高嘅手打丸，仲有脆肉鯇魚腩、鱔片，肥牛都幾新鮮，手打蝦滑同墨魚滑好爽甜，海蝦好爽好新鮮，是日海鮮每日都唔同，我去嗰日係蜆，仲有好多肉類，菜種類反而唔係咁多大概5款，不過佢有稻庭烏冬同埋韓式年糕，呢啲成本都唔低㗎！
飲品都係任攞， 飲品一樣都好多款，包括樂天韓國汽水、Jolly Shandy都有，唔鍾意飲汽水嘅又有自家制竹蔗茅根㖭！甜品就有芋頭牛奶同雲呢拿兩款味道嘅軟雪糕，自助式自己食幾多唧幾多，仲有棉花糖、糯米糍、爆珠等等配料任你添加。
年近歲晚朋友聚會多，呢間係唔錯嘅選擇，記得要早啲打去book位即日打去一定唔會有，諗住walk in嘅就要靠運氣喇！◇
賀年食品推介
東方小祇園每逢年近歲晚大排長龍，皆因佢嘅賀年食品好多都好好食， 包括我而家推介嘅角仔，角仔好鬆化咬開充滿花生芝麻香，真係一食就停唔到口。仲有佢嘅傳統年糕，傳統年糕係用片糖同蔗糖做，甜而不膩。豆沙角一樣非常好食，佢嘅豆沙唔同一般嘅豆沙，特別香，咬落去充滿香氣，新鮮熱辣出來又係一隻接一隻唔停得口㗎！豆沙角冇相，因為等唔到影相已經先畀我食曬喇！
無酒精香檳
呢款德國Sichel酒廠出嘅Blue Nun香檳，入口帶花香同果香，氣泡細密好好飲，重點係佢無酒精，駕車人士飲多都唔怕，價錢又大衆化，我自己都買好多送禮自用，朋友飲過都讚好。仲有幾日就過年，大家可以買嚟同親朋戚友一齊分享。◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
