朋友推介我去一間尖沙咀嘅樓上café ，佢話裏邊好多好有特色、賣相又得意嘅食物，我見到一定鍾意，聽到佢咁講我梗係即刻去試吓有幾靚幾特色啦！
估唔到呢間White Button Café咁大間、座位寬敞樓底又高，兩邊都係大大嘅玻璃窗好光猛。佢嘅卡位大到可以坐六個人，枱面上有巴黎鐵塔嘅裝飾，坐位重有咕臣添！周圍仲有啲得意嘅裝飾，又有乾花擺設，好多影相位！
打開餐牌見到好多都係特色食物而且係好特別未見過嘅造型，我幾乎所有都想點嚟試下，但當然係冇可能嘅事啦，哈哈！第一眼就畀佢個好似遊樂場一樣嘅tea set吸引住，第一時間即刻點來試，呢個tea set包兩杯特飲，特飲可以選擇餐牌上任何一款，我點咗水晶球特飲同埋好特別、係藍色叫首爾塔嘅特飲，另外仲點咗佢好出名嘅梳乎厘班戟配士多啤梨忌廉，同埋叫龍捲風嘅甜品，另加一杯柚子藍蝶花乳酸特飲，同一壺玫瑰水蜜桃茶。
Pookie tea set一上枱，我同朋友都被佢吸住，個tea set好似遊樂場一樣，6款甜點放喺小丑公仔盤上面，4款鹹點就放喺摩天輪上面，摩天輪仲可以轉動，真係好得意可愛，見到都開心！4款鹹點分別係爆谷雞球、迷你芝士漢堡、脆香薯角、蜜糖法蘭克福腸。6款甜點係野莓馬卡龍、焦糖爆谷慕絲、草莓法式泡芙、榛子拿破侖、香蕉芝士餅、法式朱古力撻。呢個tea set係好食嘅，我覺得佢甜品尤其出色，真係每一款都好食，估唔到café做到咁嘅水準，就算平時偏甜唔係人人都接受到嘅馬卡龍佢都做得甜度剛剛好，基本任何人都可以接受，抵讚！
水晶球特飲真係令我愛不釋手，真係好似水晶球造型一樣得意好玩，打開裏面仲有彩色嘅閃燈，佢哋連細節都一絲不苟，飲落去係青蘋果黑珍珠，好飲！
好靚藍色嘅首爾塔係柚子藍柑，雖然係藍色但飲落去冇伏仲幾香柚子味添！但玫瑰水蜜桃茶就淡而無味。
食到一半香噴噴嘅梳乎厘奄列送到，香噴噴熱辣辣入口鬆軟有蛋香，配埋士多啤梨忌廉同雪糕口感一流，難怪咁出名，呢個真係必食推介！
最後上枱嘅係龍捲風，好似一大舊粉紅色雲咁嘅棉花糖，棉花糖下面係士多啤梨慕絲，裏面有柚子醬重食到柚子皮添，配埋一齊酸酸甜甜好開胃，記得要食快啲因為棉花糖會溶。食食吓仲見到隔離枱嚟咗個棉花糖雪人，個雪人仲會噴煙添，真係好得意㗎！
呢間café不論環境同食物賣相女仔一定鍾意，最啱就係三五知己相聚，多影相位又夠光猛，鍾意自拍又得，點影都得，值得去試！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
📰支持大紀元，購買日報：
https://www.epochtimeshk.org/stores
📊InfoG：
https://bit.ly/EpochTimesHK_InfoG
✒️名家專欄：
https://bit.ly/EpochTimesHK_Column
