MIRROR成員姜濤的全新單曲《Every Single Time》昨日(7日)正式上架,新歌MV專程飛到台灣拍攝,並請來了馮德倫擔任導演。兩人「互笠高帽」稱讚對方,不過馮德倫亦稍有微言,希望姜濤以後不要在深夜傳訊息給他。
《Every Single Time》由張繼聰作曲,姜濤表示收到demo時正與家人外遊,第一次聽到時,腦海已經有MV的畫面。「聽到嘅時候真係覺得係一首好適合有mic stand同戴帽嘅歌,腦海即刻想像到呢個畫面,然後就好興奮同佢講話一定要隻歌。特別多謝佢(張繼聰)寫咗隻咁好嘅歌俾我,雖然我喺上一個個唱已經表演咗呢首歌,但一年後先推出呢隻歌,但佢從來冇催我,實在十分感激。」
新歌MV特別請來曾獲得第18屆台灣金曲獎最佳MV導演獎的馮德倫(Stephen)擔任導演,兩人之前合拍廣告時認識,馮德倫亦透露願意接受邀請的原因:「咁靚仔點會唔應承啫,同埋過去拍電影,都鍾意一啲有動感嘅嘢,無論係功夫、動作、跳舞都拍過,而且我都想同年青人合作下,知道阿姜叻跳舞,所以想汲收下經驗。」
姜濤表示,今次MV只是與馮德倫簡單交代了自己的想法,其餘則全部交由對方「發板」。「因為既然搵咗Stephen幫我執導呢個MV,就非常信任佢,當然作為歌手,對每一首歌都要有自己諗法,亦會提出咗先,但Stephen本身都係好優秀嘅導演,所以我喺MV製作方面都放心交俾佢,even最後方向唔一樣,我都完全信任佢嘅方向係會俾另一個感覺俾我。」
Stephen就認為,姜濤的意見令MV的整個製作更加好玩:「阿姜都俾好多想法,有時導演唔係就咁想放乜就乜,可以大家來來回回去溝通成件事,好似我想拍4、50年代film noir(黑色電影)感覺嘅嘢,通常嗰種都好stylish好有風格,講啲好似偵探、好壓抑、好anxiety嘅題材,姜又想有啲舞步加入帽嘅元素,咁就啱晒!嗰個年代黑色電影裡面嘅偵探就係有戴帽,呢個結合會係幾有趣,而且阿姜未拍過黑白嘅影片,而家style圍繞呢個主題去製作,所以都係未做過嘅嘢,今次創新下,同埋我亦都鍾意拍跳舞呢!」
談到兩人溝通方式,姜濤自爆晚上靈感特別流暢,不時在凌晨send短訊給Stephen,「有好多靈感係半夜三更先諗到,諗到就會想即刻話俾人聽,包括我嘅監製、填詞,以前都係諗到就即刻講,通常都係半夜三更嘅時間,唔好意思,不過Stephen好好,好遷就,一直都好有耐性去聽我講想做嘅嘢,而喺佢做到嘅範圍內,佢都會做俾我,所以係非常好。」
Stephen就開玩笑向姜濤「投訴」:「下次早啲瞓覺,唔好咁夜text我,有時我唔記得熄機,就俾你嘈醒,下次臨瞓唔好諗咁多嘢,同埋唔好飲咁多咖啡。」
另外,姜濤今次再次請來羅志祥的排舞老師大目編舞,當中加入了飛帽的一幕,大目表示知道姜濤要到達台灣以後才排舞,都擔心動作太高難度很難做到,但沒想到姜濤「一Take過」便把帽接住,帥氣十足!不過姜濤都指今次的舞步,是歷年來最難跳的一次。@
------------------
📰支持大紀元,購買日報:
https://www.epochtimeshk.org/stores
📊InfoG:
https://bit.ly/EpochTimesHK_InfoG
✒️名家專欄:
https://bit.ly/EpochTimesHK_Column