上星期五同一個好鍾意食芝士嘅朋友食飯，但係西餐又食到悶悶哋，我帶佢去咗呢間位於沙田嘅台式餐廳，平時lunch同夜晚時間都好爆場排長龍㗎！我哋兩點幾去到，剛好佢下午茶時段之餘人又唔多。佢嘅下午茶餐好抵食，叫餐牌裏面嘅食物，只需加8蚊就有杯飲品，特飲都只係加18蚊！
坐低叫咗必食嘅溶岩芝士雞，熱辣辣脆卜卜嘅農夫包裏面裝滿好似岩漿一樣嘅半溶芝士，將件雞蘸落芝士度再拉起會拉出好長好多嘅芝士，睇見都興奮。熱辣辣岩漿咁多嘅芝士配上脆嫩嘅炸雞，好味到唔停得口。食完炸雞最後成個農夫包連剩餘嘅芝士都食埋，一啲都唔嘥。
仲有佢嘅綜合水果茶，水果茶係正宗台式，裏面除咗有水果仲放有一粒話梅，而最特別嘅係佢會附上一粒裏面都有水果嘅冰塊。
跟住我再叫咗一份鹽酥雞、維多利亞的秘密、同埋一個阿春麵線配海山炸豆腐下午茶餐，餐飲就點咗一杯凍珍珠奶茶（微糖少冰）。鹽酥雞跟有六款味粉可隨意添加，我比較鍾意紫菜加咖哩味，朋友話梅子都唔錯，芝士就好甜麻麻地，香辣我冇試因為我唔食得辣，原味即係淮鹽。
阿春麵線味道都唔錯，相比喺台灣食到好杰身、好重口味、好多味精嘅，明顯冇咁濃冇咁杰，比較適合香港人口味，我鍾意呀！炸豆腐好香脆唔油膩。
維多利亞的秘密其實就係雜莓乳酪沙冰，呢個真係好好飲，沙冰上面嘅生果都係雪到冰硬入口好似雪糕咁，又大杯，咁啱呢幾日氣溫回升天氣都幾熱，飲佢真係超冰涼又解渴。呢間提供嘅台式飲品非常貼心，可以任選甜度同冰嘅份量，珍珠奶茶我叫咗少甜少冰。珍珠奶茶入口幾有茶味真係少甜，唔錯！但係珍珠一咬就碎好粉，完全冇一般珍珠嘅煙韌彈牙口感而且勁甜，最終只係飲曬杯奶茶淨番所有珍珠。
我知道大家最關心嘅梗係價錢啦！由於下午茶時段免加一，而且飲品又有特價，就算食咁多嘢埋單都只係二百幾蚊，係咪好介紹先？！以後大家經過沙田又多一個好選擇喇！◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
📰支持大紀元，購買日報：
https://www.epochtimeshk.org/stores
📊InfoG：
https://bit.ly/EpochTimesHK_InfoG
✒️名家專欄：
https://bit.ly/EpochTimesHK_Column
