不滿麥當勞職員態度 外賣員潑水掉餐認失去理智

一名女外賣員在馬鞍山一間麥當勞，疑不滿職員態度惡劣，衝動下將櫃台上的外賣食物及飲品擲向櫃枱內。事發片段在網上傳出後，該外賣員在網上指自己禮貌提問後，遭職員責罵，承認自己有情緒問題、行為不當，但當時「實在係太嬲，嬲到失去理智」。

一段在今（26）凌晨上載社交平台Threads的片段顯示，一名女子在麥當勞與一名染上紫色頭髮的中年女職員爭吵，質疑對方態度，中間夾雜粗口，雙方揚言報警，女子一邊在取餐處旁邊的水機盛水，一邊表示「（說我）阻你做嘢，咪唔好做咯！」，隨即將盛好的水潑入櫃枱範圍內，並順勢將放在取餐處的食物擲向櫃枱內。現場即傳出聲音，指「唔好俾佢走！唔好俾佢走！報警！」，女子回應「就係要你報警」，並衝入櫃枱內，又進入一個房間。中年女職員著人鎖後門，稱要防止對方離開。鏡頭後疑似旁觀者說，擔心女子衝動下取刀。

警方接報趕至處理，涉事的一名三十多歲女店員疑因不適及頭暈，須由救護車送往威爾斯親王醫院治理。警方將案件列作「投訴滋擾」及「有人不適」跟進。

女外賣員：禮貌提問遭惡劣態度回應

片段下有一名網民留言，稱自己是片中的女外賣員，並附上從自己角度拍攝的影片。她憶述事發過程，指當時從外賣平台Keeta接單，在麥當勞等待期間「一直耐心等候冇出過聲」，20分鐘之後，自己忍不住禮貌地問店員「唔該，我想問吓xxxx號仲要等幾耐左右啊？」，但一名染上紫色頭髮的女店員「就跳咗掣咁樣」「唔知係咪因為太忙所以搞到好躁底，就將啲情緒發洩晒落我度，向我發火，態度好差好惡好大聲咁樣話：『你催乜嘢催啫？！你啱啱已經催咗三次啦喎！！我哋而家好忙啊！你見唔見到呀？我哋咁忙點答到你呀？你催嚟都冇用㗎喎！我已經話咗答唔到你啦！點啊？你催夠未啊？』」

女外賣員在文中稱，「從頭到尾，我唔係唔體諒佢哋忙，佢哋完全可以好聲好氣咁回答我『唔好意思，我哋而家好忙，答唔到你要等幾耐，所以可能要等耐少少』我可以接受到佢哋呢種講法，我可以體諒佢哋忙所以需要多少少時間，但係我接受唔到嘅係佢哋惡劣嘅態度！從始至終我只不過係禮貌咁問咗一句要等幾耐冇催過，但個紫色頭髮女店員一嚟就好惡咁樣鬧我，仲屈我催咗三次。後嚟我同餐廳經理交涉，要求佢處理呢次糾紛，嗰位紫色頭髮嘅店員仲不斷插嘴輸出鬧我唔俾機會我講嘢。」

女外賣員續指，該經理態度是想息事寧人、「打發我走」，引述對方指「咁你而家想點呀？我已經同你講咗我哋而家好忙答唔到你，咁我而家執咗你個餐俾你先你就走啦好冇？」，不滿該經理從無重視過店員的態度問題。外賣員並稱，當時自己標明要投訴有關店員，要求對方給予該店員的名字，「我追問咗佢好耐佢先至肯俾（畀）我」，之後對方無理會自己，「自顧自咁做自己嘢，當我透明」。自己當時「實在係太嬲，嬲到失去理智，所以衝動之下就攞水潑咗個店員，將啲餐抌落地下發洩。」

女外賣員承認發洩行為不對，「的確唔係一個明智嘅做法，但係從始至終我只不過想討回一個*公道*，我要嘅只不過係一個*態度*！！！」她續指「可能有啲認識我嘅人會對我有偏見。我承認我係有情緒問題，我亦都知道情緒問題唔係大晒。我想再強調一次呢件事我並唔係認為自己啱晒。但係我希望大家單純針對件事去作出評價，而唔係針對個人，唔好因為對我或者有情緒問題嘅人嘅偏見而先入為主。」

網民意見不一

不同網民對事件議論紛紛。有人不滿麥當勞方面「你地（哋）啲員工啲態度咁差，容許員工同個客嘈交，經理咁樣處理方法咁廢既（嘅）？忙大哂？？仲叫人唔好去果到拎外賣，唔講以為紫色頭髮員工係間鋪老闆」，又有人批評「女員工絕對唔適合前線服務，影響公司形象，阿經理就要再培訓點樣應付衝突場面！」、「好多時見好多m記員工對啲外賣人又真係好無禮貌」。

但亦有網民批評外賣員「咩原因都好，唔代表你可以咁樣掉野（嘢），小姐，刑事黎，你控制唔到自己就睇下醫生」、「串唔串其實就好小事，但係倒人水，再倒橙汁，再入人哋私人範圍，同埋影響其他食客就一定係錯」、「擔心一下要不要留案底同埋賠幾錢好過啦！仲講個員工咩態度，我只係話你知佢最多轉工就冇事，你就大鑊好多」。@