看似老僧入定，但係其實內心洶湧澎湃；睇佢矮矮細細面無五兩肉，皮膚黝黑，好多人以為佢係一個好普通嘅人，好似係一堆煤炭，洗盡鉛華先見到粒鑽石，要清清楚楚乾乾淨淨，先見到佢嘅真面目。

TT君凡事都通，教車修車整水喉電器洗爐頭安裝警鐘閉路電視開門鎖門音響唱歌唔食午飯件件皆能，事事唔計較，不論報酬，不問時間，隨傳隨到，簡直係人間極品。問佢心目中最想嘅係乜嘢，竟然啞口無言。

沒有太深父子緣，父親對佢憐惜，母親就疼愛哥哥長子嫡孫。八兄弟姊妹，排行孻仔，上有四兄弟姊妹早夭，四、五十年代大抵家家如是，嬰兒難產難養。母親喺傳統家庭主婦，父親喺一間豆類芝麻舖做掌櫃，同老闆一家人共住永樂西街近三角碼頭嘅六樓，樓下就係貨倉同埋店舖。

父親學識做買賣，於是呢就自己開始租用曬場，喺非洲入口黑芝麻白芝麻，自己做老闆。最初嘅曬場係一個籃球場咁大，但係經過四次五次嘅換地，由葵涌荃灣屯門各地搬嚟搬去，最後係葵涌嘅曬場就有幾個小型足球場咁大。原來啲芝麻呢係好污糟要用好多水嚟洗嘅，曬芝麻呢又係好講天氣，溫度非常適中，一出油呢啲芝麻就冇用㗎啦。

白芝麻嘅價錢比黑芝麻高好多，黑芝麻可以做芝麻糊同埋芝麻糕，一家人幾乎日日食芝麻糊，全家人頭髪都黑到金。父親又創新咗壓榨白芝麻油同埋做芝麻醬，當時呢係獨市生意，只做批發；生意滔滔，都係行行出狀元。

一家人搬到近利舞臺嘅霎東街自置三房物業，呢間祖屋就留咗俾TT啦。當時做生意靠一個黑布袋，主客兩方伸隻手係黑袋裏邊握手議價，就可以成交。個牌子呢就叫做「狗仔嘜」好受歡迎，再想創新多一個「天鵝牌」呢就冇人問津喎，其實係同一樣貨色嚟㗎，所以話成功與失敗，有時都係要靠彩數。

TT入讀余道生官立小學，哥哥讀寄宿小學，TT讀書成績強差人意，中學入讀香港英文書院，中五成績都係麻麻地，1969年被送到英國南部聖約翰學院重讀中學，1月1號元旦上機，全機只有一共三名同學，中途經杜拜。

幾經掙扎，英文都係追唔上，勉強讀上理工學院工程科，26、7歲才勉勉強強算係畢業。畢業即失業，雖然係讀書期間已經考取了教車師傅牌照，但係70年代都冇乜華人要學車，喺駕駛學校嗰度啲學神一見到華人教車師傅轉頭就走，所以捱咗兩年後都係要轉行，真係往時唔同今日。

TT改行做外賣店餐館樓面，無拘住處，乜都肯做，人又隨和。有一日做廚房的第一前妻嚟餐館探外父，相識後拍咗一年拖有咗大仔於是返香港結婚擺酒。父親送咗40萬港幣俾佢置家，開始佢嘅店舖老闆生涯，懂得搵一啲生意唔好冇A3飲食牌嘅餐館，翻修後成功申領牌照，幫忙人家開店賺錢；自己亦都喺407巴士總站一個好美麗嘅山城小鎭，開設佐第一間嘅餐館，讀書唔成，但係努力勤力搏殺，最高峰嘅時候同時擁有四間餐館同埋外賣店，生意火紅，日對爐頭，夜對枕頭。

冷待了嬌妻發生了婚外情，TT第一次發現嗰時就願意將果一間店舖交俾佢妻子同埋呢個男子，點知個男子卻一走了之。咁以為從此歲月靜好，可以慢慢再重建家庭生活，而個時都已經有四個仔；讓妻子回去外父嘅店舖度幫手，點知又遇上了另外一個從牛劍大學肆業的同工，TT發現之後就話將嗰間餐館俾咗佢地，4名子女就由TT君獨自撫養。

大仔出生後送返香港俾嫲嫲照顧，發高燒送入養和醫院治理，到一歲時說話有障礙，行動不便；兩歲多時攞佢返嚟英國照顧，醫生話到咗17歲時或許有轉好機會，而家大仔已經入住左一個庇護宿舍多時，每年難得見幾次面。次子是一級榮譽畢業的工程師，三子四子亦都大學畢業，各有歸宿，養兒育女。

TT一直都係南部居住同埋經營生意，不時都有流言中傷話餐舘衛生條件唔好啦，食物質素又差等等；最嚴重嘅一次係稅務局突擊檢查，前後封咗間舖查單，最後稅務局要求繳交350千英鎊嘅VAT附加稅款。

咁大筆嘅數目一時當然冇能力償還啦，意興闌珊，於是結束晒強所有嘅餐館，討價還價好幾年後，一位印度人嘅會計師最終成功上訴減為35千英鎊欠稅款，立即繳付。會計勸喻TT以前所有嘅金錢積蓄一定唔可以重見天日，否則都係會被追討，從此TT謹守會計師嘅勸勉冇車冇樓冇儲蓄生活一貧如洗全靠社會福利。

結束飲食生意之後。TT轉行去經營音響器材，而且又做錄影帶服務，配合嗰啲送蔬菜肉食到外賣店嘅飛機仔將錄影帶送去唔同嘅家庭，當年佢同香港無線電視台英國嘅負責人開拓呢一個行業，華人外賣家庭掀起煲電視劇集狂潮，唔使去咁多賭場，又可以俾下一代學習粵語。

錄影帶好多人會互相借用分享，咁嘅生意亦都係好景不常；最後無綫電視仲改為安裝天線盒仔設計，錄映帶生意服務一落千丈；蓋萊頓榮業行個老闆叫佢不如兼賣機票，勉強支撐一段時間咁前前後後都撐咗五六年，店舖還是以失敗告終，連最後一筆嘅租金呢葉老闆都免收啦。

喺第一段婚姻失敗之後生活失調，煩躁不安，其中一名來自國內嘅僱員就幫忙照顧4名尚在求學的兒子，兼顧生意，結婚後亦都育有一子，如今已大學畢業。但係到咗呢位女士攞到英國居留之後，佢就提入出離婚啦，咁你覺得係咪人生嘅意外另一章，TT話呢個妻子唔係靚亦都唔係特別叻，不過佢大前題為咗要爭取英國居留權不論身世，而當時自己心如死灰，冇乜所謂。住埋一齊結埋婚生埋仔後都唔能夠改變提升大家感情，所以TT都接受咗呢一個現實，將同住個間屋俾咗第二位前妻，自己剩身再闖天下。

TT於是做咗一個24小時全天候嘅護理者，照顧一位塞浦路斯嘅傷殘人士，一齊住，轉眼時光又四年呢位傷殘者79歲死去；TT頓時變得無家可歸，由於是工作紀錄良好的社區護理者，市政府就俾佢揀選南倫敦一個屋邨嘅二層物業入住，二百年前是為退休酒吧業人士而設，大禮堂的大花窗於二次世界大戰轟炸時絲毫無損，環境清幽，格局優美，管理良好，又住咗15年啦。往事日期年月，大概而已，TT已怯於翻箱倒籠查個究竟。

兄弟姊妹四人都得父親各贈一處物業，TT分到嘅係霎東街祖屋，姐姐唔准佢出賣，賣亦只可以平賣俾佢；佢哥哥分到灣仔區嘅一間店舖，由於70年代香港興建地下鐵路，店舖收地最終得到30,000,000港幣嘅賠償，哥哥將呢筆錢喺英倫中部一個城市買咗好多物業，兄弟情淡，幾十年來都係冇乜交往。

再問TT佢石沉大海嘅積蓄會點樣使用？佢話一切有待遺囑公佈。TT肯定不飲酒不抽煙，似乎也不嗜賭，他說當年做老闆也會車一大班伙記到賭場逢場作興。生活之苦好似苦行僧，係咪對自己嘅一種懲罰，覺得自己係一個人生失敗者？

TT最近10年都係社區中心做義務工作，不論大小巨細無遺，做唔掂都有橋度掂，無父子緣，無夫妻緣，只有桃花緣，花開花落，緣滅緣起，到咗而家咁嘅年紀、心態，樂天知命，化石一樣讓人看不清楚猜不透，英國嘅生活，你話貧乏富足皆可以，你話懽樂悲欣無常，又可唔可以？

若雲煙過眼◇

（本報專欄作家所提出的批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意。）

------------------

🏵️《九評》20周年
https://hk.epochtimes.com/category/專題/退黨大潮

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand