【米芝Gi周記】大帽山飲茶記

地道香港人都知道川龍村端記茶樓好有名，好老字號又有人情味，每逢海外朋友嚟香港玩，我都會帶佢哋去試吓。佢哋開心鍾意到不得了，覺得好特色好得意，佢哋最愛嗰碗山水豆腐花，真係滑一滑零舍不同㗎！我自己間唔中都會去歎吓茶，真係歎茶坐幾耐都冇人理你，望住大大個藍天、呼吸住新鮮空氣、聽住茶客嘅雀仔叫，過一個悠閒嘅上午，整個人放鬆一下！

因為交通唔係太方便只有一架專線小巴行經，所以呢度嘅寧靜冇被打破，去嘅多數係駕車人士或者附近嘅老街坊，大家都好熟。茶樓對出就係空地可以泊車，附近都係村屋冇高樓大廈擋住，再上就係大帽山頂所以空氣好好，好舒服！

茶樓本身都係村屋改成，地下係廚房同放點心嘅地方，地下有冷氣，二樓就係騎樓底有瓦遮頭冇冷氣，但係望出去有景睇，地下同二樓都分別設有洗手間同茶水間，分流得唔錯。記住呢度所有嘢都係自助嘅，自己去攞茶葉沖水攞位，想食咩都係自己動身去攞㗎！點心每日新鮮製造，可惜而家煎炸嘅點心只有假日先有。雖然係咁，但係見住咁多點心喺自己面前任揀都真係未食先興奮。

客人可以自己去攞茶葉沖水。

點心都係自己攞。

首推懷舊大包、鵪鶉蛋燒賣同馬拉糕，仲有排骨係必食，佢啲排骨真係好好食，味道同一般酒樓完全唔一樣，好傳統嘅味道。佢仲有即燒燒鴨添呀，熱辣辣好正㗎～當然唔少得就係最出名嘅山水豆腐花啦，真係幾飽都要食唔係講笑。豆腐花佢係會裝畀你嘅，只要同佢講要幾多碗就得，識食梗係落黃糖啦！

懷舊大包。

鵪鶉蛋燒賣。

最出名嘅山水豆腐花加黃糖。

飲飽食醉後你可再慢慢留意周圍街坊嘅互動，好老朋友好舒服，而且你會發現佢冇點心咭蓋印，冇人睇住你監視你，埋單嘅時候就係數你枱面點心籠同碟嘅數量，唔怕你出蠱惑因為大家係講個信字。大家亦唔會霸佔枱櫈，全部都自動自覺友善又守規矩，所以我話好舒服。

附近街坊都好好，你飲完茶唔識路出番去佢哋又會帶路，你搵唔到唔識路佢哋會主動帶路。記得以前第一次去嘅時候俾的士司機唔知兜咗去邊度，一個喺附近住伯伯主動帶我走一段路去到茶樓，伯伯堅持帶我走話我唔熟路怕唔識行，真係好感動！大家有機會一定要去試下感受下我哋嘅地道香港情懷呀。另外提提大家茶樓收得早，一般下晝兩點就收，12點過後已經冇咩點心㗎喇，所以要去就要早。想要試埋煎炸點心就要等假日，佢嘅炸蝦角同炸芋角都好好味㗎，而且佢煎炸點心可以每樣一件砌夠一碟真係超好超貼心，讚呀！◇

米芝Gi鍾意飲飲食食，對食物質素絕對有要求，食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com