上星期五約咗朋友去澳門行吓,我好多年冇去過澳門啦。澳門其實大街小巷都有好多美食,可惜天公不造美,去兩日落足兩日雨,第一日仲係大雷雨添,落船出咗碼頭後出面周圍都水浸,真係寸步難行。雖然食唔到街邊小食但係仍然冇阻我搵好嘢食嘅心情。

去咗住處放低行裝,等細雨啲就即刻坐的士去我逢到澳門都必去嘅沙利文餐廳,呢間餐廳已經有50幾年歷史,門口貼有好多獎章,內部嘅裝修依然保持住葡式裝潢風格,木製嘅樓梯、典雅嘅吊燈同餐具,都畀人一種古典嘅感覺。多年嚟裏面侍應嘅服務都一樣咁好,全部都溫和友善。每一個細節,小至斟水同上餐嘅動作,你都會感受到佢哋受過餐桌禮儀嘅訓練,都係優雅嘅。

每次到沙利文我必食佢哋嘅扒大蝦(扒大蝦每日價錢唔同,視乎來價同重量)、周打魚湯同木糠布甸。雖然隔咗幾年,今次我仍然點咗呢三樣,加葡國雞同炒雜菜。留意佢枱上面會有一支水係收錢嘅,侍應會問你需唔需要,唔需要嘅話,佢會另外斟水畀你。

先上嚟嘅係周打魚湯同熱辣辣嘅豬仔包,豬仔包烘得好香脆,入口外脆內軟同依家餐廳嘅餐包完全唔一樣,好食到我哋每人食完一個覺得唔夠喉,侍應仲送多兩個畀我哋,真係好大方㗎!周打魚湯做得好傳統,裏面除咗有周打魚肉,重有蜆肉、薯仔粒同紅蘿蔔粒,除咗飲點麵包都好食。

焗豬仔包
焗豬仔包

 

周打魚湯
周打魚湯

跟住上嚟嘅係扒大蝦,扒大蝦今次同以前唔同,以前係鐵板上,依家係碟上,但一樣燒得香脆油份充足,大蝦一如以往蝦肉爽口彈牙,食到好多蝦膏,連蝦殼都好入味想吞埋落肚添呀!

扒大蝦
扒大蝦

再嚟就係葡國雞,葡國雞係傳統葡式焗製,同香港改良咗,好重椰奶味嘅葡國雞完全唔一樣,葡國雞不論配飯或者配豬仔包都好味㗎!蒜蓉炒雜菜就冇咩特別。

葡國雞
葡國雞

最後上嘅木糠布甸同以前嘅水準一樣冇變,木糠布甸上枱時有一定冰度,入口好似食緊雪糕一樣嘅感覺,口感綿密軟滑混合餅乾粉末層次分明,甜度適中,簡直係呢餐完美嘅落幕!

木糠布甸
木糠布甸

木糠布甸
木糠布甸

侍應喺我哋影相嘅時候都好配合好友善,臨走嘅時候仲提醒我哋攞齊嘢,真係食物同服務都有質素㗎!◇

沙利文餐廳

地址:澳門南灣大馬路512號

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com