有300年歷史嘅Dalloyau來頭唔少,1682年法國國王路易十四品嘗過Dalloyau嘅甜品後,其家族就成為咗皇室糕點御廚,真係好駕勢啊!精緻糕點每日新鮮製造,仲有法國餅師來香港監控甜品嘅品質。

佢最出名嘅係Opera蛋糕,不過我今次試嘅係Douceur Exotique (熱情果香蕉奶油慕絲),外型橙色晶瑩剔透脹卜卜好可愛,外層啫喱狀佈滿新鮮呍呢嗱籽。入口首先係好香甜幼滑嘅奶味慕絲,中間就係微酸充滿熱情果香嘅慕絲,兩者混合好夾,酸酸甜甜好醒胃,下面係薄薄一層朱古力加香脆嘅餅底。

整件蛋糕香脆幼滑又有層次,真係太好味,太好味,太好味啦!重要事情要講三次!絕對唔係賣廣告,識我都知所有嘢我都係畀錢去食嘅,唔好食一定照講冇面畀,鍾意甜品嘅一定要試吓!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com