越來越多主題餐廳進駐香港,間間都好得意食物又精緻外表靚爆燈,真係想間間都去齊。近年P助同粉紅兔兔勁hit,所以趁住聖誕幾日假期我就去咗YATA Kanahei's small animals café by IZUMI CURRY,成間餐廳都係粉紅色,小朋友同女仔一定鍾意。餐廳門口就有P助、粉紅兔兔同埋佢班friend坐住3米長嘅農夫車佈置(呢個已經係第一個影相位喇!),裏面牆壁、枱櫈全部都係P助同粉紅兔兔不特止,每張枱仲放有佢哋嘅造型咕臣,可以一邊食一邊攬住又得,影相又得,真係好開心好治癒㗎!

我早早去唔單止唔需要排隊,仲變咗包場想坐咩位都得添呀~yeah!不過食物種類唔多,我去嗰日侍應仲話明太子賣晒未返貨,所以蛋包飯暫時停止供應。我點咗天婦羅烏冬、炸雞咖哩飯、鮮茄茄子意粉、餃子雞翼、雪糕士多啤梨奶特飲,同埋cappuccino。我哋三個大人一個小朋友食,叫嘅其實唔多,主要真係試吓,好彩食物上得唔係好快,否則張枱唔夠位擺。

 

 

鮮茄茄子意粉份量同料都算係幾多,意粉幾煙韌唔錯,蕃茄味濃仲有好多蕃茄蓉,好開胃細路仔最鍾意。IZUMI CURRY咖哩一向出色,所以天婦羅烏冬同埋炸雞咖哩飯真係好好食,烏冬湯底好濃,佢唔同於一般日本咖哩係偏甜,佢鹹甜度剛剛好,而且香濃之餘帶有少少辛辣,就算我唔食得辣嘅人都接受到,我連湯都飲埋。不過天婦羅嘅炸粉都幾厚,俾湯浸得耐浸到淋曬唔好食,我將啲炸粉咬咗出嚟先食;除咗天婦羅佢其它嘅炸嘢唔錯,有驚喜。炸雞外脆內軟而且雞皮炸得卜卜脆好薄,我平時唔食雞皮㗎!呢個又ok喎!咖哩汁好濃又多,一定夠每一羹飯都沾上。仲有餃子雞翼都係炸到金黃脹卜卜,好食。

嗱,到飲品喇~飲品真係唔掂,杯cappuccino得意就得意,係P助個樣,但係飲落好似奶水咁完全冇咖啡味,唔落糖都甜。仲有嗰杯雪糕士多啤梨奶特飲,嘩!入口甜到呢,真係死甜,甜到成杯糖水加奶水咁,一啲士多啤梨味都冇,我飲咗兩啖就唔想再飲,呢啲咪叫中伏囉!畀佢哋靚靚嘅外表欺騙咗,不過呢杯特飲附送嘅粉紅兔兔杯墊就好得意,但係奉勸大家都係飲返汽水穩陣。

埋單4百蚊價錢不過不失,都值得去食嘅,係飲品唔得啫!隔離仲有好多P助同粉紅兔兔嘅精品賣,全部都超可愛,大家等位嘅時候可以影住相睇住精品先!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。

如有好嘢正嘢想同米芝Gi分享,或者查詢及反饋,請email:micgigidjy@gmail.com