每逢有新甜品店開張,我呢個甜品王又點會錯過呢!仲要係可愛到爆燈嘅Little Twin Stars,一知道就想即刻衝去食。不過呢啲公仔主題餐廳必定大排長龍,等位等到變公仔(化石嗰隻),所以我擇咗個吉日,咩吉日?嘻嘻……就係人人返工我放假嘅閒日,仲要係office hours,仲要一開門我就到,咁就實有位,兼且人唔多任我鍾意點影就點影,加上晨早食甜品對我呢啲一早起身都可以先來杯雪糕嘅甜品王嚟講,完全冇難度!

餐廳開11:00am,我10:45am就到,不出所料門外不足十人等緊,朋友先去排隊我就安心慢慢睇慢慢影。成間餐廳都靚到影唔停手,門口大大個星星形拱門加Lala & Kiki各企一方,周圍佈置全部都係佢哋嚟㗎~椅背都圍住立體星星,連燈都做成雲朵外型,超得意。仲有一個賣Little Twin Stars精品嘅小counter,造型一樣靚到dum一聲,好多人經過都忍唔住停低影返張相。

入到去坐低就要急急點餐,因為每枱坐低開始計限時90分鐘,每人最低消費$130仲要加一,不過主題餐廳都預咗係要呢啲價錢,總之唔好「賣相一流,味道九流」就已經偷笑。

款款甜品賣相都精緻可愛到暈,款款都愛不釋手,真係好難揀,我哋三個人最後點咗一個二人餐加一人餐,包括:夢幻粉星層層蛋糕、芒果班戟、糖不甩、Lala士多啤梨西米露、Kiki Latte、Lala紫薯鮮奶、Kiki紫米露同埋夢幻星空梳打。甜品一上枱我哋就狂影,好彩甜品唔係熱食,否則熱食都變冷盤,影到朋友催促時間有限先收手。

先來一啖夢幻星空梳打,係藍蝶花加熱情果酸酸甜甜好好味呀~我左手揸叉右手匙羹左右開弓,(通常見到美食甚麼儀態呀,斯文呀,淺嚐點到即止呀,通通掉低收埋先,食完先攞番佢哋出嚟啦!)夢幻粉星層層蛋糕好鬆軟,最鍾意係佢唔係好甜,連上面塊白朱古力都唔係好甜,配搭上面嘅雲呢拿同朱古力雪糕好夾。士多啤梨西米露好多士多啤梨好足料;糖不甩好煙韌;芒果班戟裏面大大嚿好甜嘅芒果肉實在太美味喇!

Kiki Latte同Lala紫薯鮮奶有驚喜,先唔計賣相靚到唔捨得食,係講甜品店嘅咖啡一般都係麻麻地因為唔係專業,紫薯甜品亦試過好多次中伏。但佢呢度嘅咖啡幾滑有鮮奶味之餘唔會搶咗咖啡味,味道剛剛好。紫薯鮮奶好滑、有淡淡紫薯味,出奇地好,極力推介大家試吓。至於紫米露相比之下就普普通通,不過不失,以幾十蚊一杯價錢嚟講不試也罷!

由於開舖時佢人手唔夠店面得兩個人serve咁多枱客有啲混亂,一個侍應小姐隨後走去每一枱同食客講剛開門人手唔夠唔好意思,仲每枱送一張超靚嘅杯墊,服務態度真係好好。佢行到我哋呢枱嘅時候,話我等得最耐仲比佢招呼咗其他客先,特別送我哋一整套加一張特別版杯墊,嘩!Big surprise!所以話呢……以心待人,以禮待人一定有回報的,哈哈!

剛好聖誕假期幾乎接住元旦假期,極力推介大家一家大細去食,大人細路都開心。米芝Gi祝大家聖誕及新年快樂,2018年繼續豐衣足食!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。

如有好嘢正嘢想同米芝Gi分享,或者查詢及反饋,請email:micgigidjy@gmail.com