米芝Gi講食

 最近鍋心八鮮蒸鍋好出名,晚晚爆場,訂位要兩個星期前訂定,可能明星效應加口碑。其實佢新開喺大圍仲未搬去太子時我已經幫襯,首先佢價錢合理又免加一已經吸引,268蚊一位,包8款時令海鮮加一個八款配料嘅蒸飯,仲有燉湯同甜品真係好ok。佢嘅做法同我哋一般食嗰種常見嘅幾層塔唔一樣, 嗰種幾層塔蒸鍋係所有海鮮已經整熟放出嚟繼續蒸住食,表面上可以保溫,但咁樣一直蒸住啲海鮮,就會過火候變老、變韌,好食都變唔好食。而呢一種係每一款海鮮喺你面前由生蒸熟,非常新鮮!

入到去坐低首先佢會給一張紙你,每一款海鮮都可以自行選擇一款醬料蒸,因為海鮮好新鮮,即使清蒸都已經好好食。鮑魚就梗係果皮蒸啦,多寶魚就揀豉汁,蒸魷魚(腸粉底)我通常都會揀紅糟,蝦就揀蒜蓉。其實以前一開始嘅時候,佢係有蒜蓉粉絲蒸,依家可能太好生意,冇咗粉絲只淨返蒜蓉蒸。最後就係八寶蒸飯,佢嘅八寶蒸飯可以起24款配料當中,自己揀8款。

最先上嘅係一人一盅燉湯,非常足料又夠火喉,有烏雞雞腳、瘦肉、蟲草花,個個都忍唔住成盅飲晒。湯之後就到海鮮,每一款海鮮都喺你面前由生蒸到熟,火喉啱啱好,保證新鮮熱辣。龍蝦爽甜有膏仲有蝦子添,鮑魚就冇咩鮑魚味但係好爽口,蒜蓉蒸開邊蝦好爽甜,多寶魚勁爽口,最驚喜就係紅糟腸粉魷魚,鍋底放咗塊荷葉一齊蒸,腸粉吸曬荷葉同魷魚所有汁嘅精華,好味到食唔停口,有啲人甚至會覺得腸粉先係主角。蟹每人半隻全部都係有膏嘅,仲有貴妃蚌同埋花甲。

 

去到八寶蒸飯基本上已經飽到食唔落,但係個蒸飯都好好食㗎,啲飯好煙韌有啲糯米飯嘅質感。最後係甜品,之前夏天係凍嘅燉鮮奶,好滑又唔係好甜,好好味呀!最近冬天就轉咗木瓜燉雪耳,好味又夠滋潤。

另外,佢哋嘅服務超好,每一枱都有侍應幫我哋蒸,幫我哋分埋上碟,連鮑魚都幫我哋起埋殼,免加一嘅服務仲好過收加一嘅酒樓多多聲。記得我有一次帶新加坡朋友食嘅時候,佢哋讚到不得了,仲畀咗百五蚊貼士,極力推介真係值得去食。◇

童年回憶經典零食

日本版甘大滋都俾我搵到,我真係勁!

童年回憶返晒嚟,細個最鍾意食佢,香港自從由四洲代理咗之後,香港版味道完全唔一樣,已經好少食。

朋友曾經問我:

日本版同香港版有分別咩?

梗係有啦~日本版、香港版、泰國版、韓國版,全部都唔一樣味嘅, 一食就食得出嚟啦!下次攞給你試吓!!

咁勁,果然係米芝Gi!

大家如果見到日本版甘大滋一定要買嚟重溫一下童年回憶呀!

近期人氣飲品Suntory透明檸檬茶水

透明水嘅顏色顛覆了人一直認知檸檬茶係茶色嘅觀念, 一打開聞到淡淡檸檬茶味, 飲之前都有少少心理負擔, 因為佢出嘅另一枝透明奶茶極度中伏,怪味、化學味好難頂。

透明檸檬茶飲第一啖有淡淡嘅檸檬茶味,味道有啲似午後之紅茶但唔會太甜,再繼續飲都OK,比想像中好,市價12至15蚊,可以一試。◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。

如有好嘢正嘢想同米芝Gi分享,或者查詢及反饋,請email:micgigidjy@gmail.com