最近去咗幾間主題餐廳,今次就去香港區鯉景灣碼頭附近嘅餐廳嘆個lunch先!平時經過見到好多人坐喺餐廳望住碼頭海景,一邊飲嘢一邊傾計都覺得好優閒寫意。為免有遺漏,去到碼頭先將整條街嘅餐廳巡視一次,由於11點幾又係閒日,間間餐廳都冇咩人,整條街多數係西餐,有一間係泰菜,仲有一間係港式餐廳。

我行到其中一間西餐廳外面見到一家人用緊餐,一眼就被個小朋友嗰杯大大杯好多cream、好似好好味咁嘅凍朱古力吸引咗,所以就揀咗呢一間叫Cull 'N Pistol嘅美式餐廳試吓。一入去侍應好nice咁安排咗我坐全間餐廳唯一嘅卡位,好舒服又比較隱蔽,又有咕臣挨吓攬吓,可能一見到我就知我有排坐,哈!坐低就更覺得舒服,餐廳望出去就係海,周圍環境高尚得嚟又清靜,真係好有南丫島飲嘢嘅feel,難怪所有人一入餐廳都揀門口位置坐啦,對住海景真係好relax㗎!

叫咗個雞肉漢堡跟餐湯,再加一杯剛剛眼甘甘望住,繼而被吸引入嚟嘅凍朱古力試吓。餐湯係蜆肉忌廉湯,好多蜆肉又有薯仔洋蔥碎,再加咗少少即時喺我面前刨嘅黑胡椒,好香好濃郁好好飲呀!大大個餡料足嘅雞肉漢堡配鮮炸薯條,麵包外脆內軟,番茄同生菜爽甜好新鮮,雞肉好軟腍入味,薯條外脆而咬開裏面有軟軟嘅薯蓉,好驚喜,真係仲好食過我喺美國食過嘅正宗美式餐呀!至於杯朱古力就真係好美式偏甜,唔孤寒好多cream同朱古力醬,鍾意好甜嘅朋友就啱晒喇!美式餐大大份一般女生可以兩個share再加個小食剛剛好。

食飽後行過對面就係西灣河碼頭,可以坐懷舊小輪去三家村行吓玩吓,三家村就係而家嘅鯉魚門,好多人專程入去食海鮮買海味㗎!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com