曾俊華：搞夜市要「天時地利人和」

本港經濟復蘇力度不如理想，財政司司長陳茂波日前表示要搞好「夜市」。前財政司司長曾俊華今日（20日）在社交媒體表示支持，但認為搞夜市「要有天時、地利、人和先至搞得起」，即有合適地點、寬鬆政策和民間創意，夜市才有生命力和人氣。

曾俊華今日在Facebook發文指，疫情過後「香港真係要諗多啲計，吸引遊客返嚟先至得」。對於現任財爺提議搞好「夜市」，曾俊華表示支持，但認為「要有天時、地利、人和先至搞得起」，即是要有合適地點、較寬鬆的政策，讓民間發揮創意，「（夜市）先至會有生命力，先至會有人氣」。

他憶述，以前香港是「不夜城」，大家都習慣去夜街，在他子女還小的時候，他們曾住在何文田衛理苑的公務員宿舍，曾俊華和太太有時會趁子女睡覺時，「拍拖去行下夜街」。

曾俊華說：「有時會行去油麻地廟街，冬天就最愛食個熱辣辣、香噴噴嘅臘味煲仔飯、或者去食嗰啲好有鑊氣嘅小炒。有時就會去女人街附近行下，買下日用品，然後睇場午夜場。我哋喺旺角好多間戲院，好似金聲、百老匯等等，都留低咗唔少腳毛㗎。我最記得以前喺開場前，戲院門口都熱鬧到不得了，有好多美食賣，熱蔗喇、燒魷魚喇，魚蛋仲有牛雜，我同太太都好鍾意拮番兩串先入場」。

惟時至今日，香港的夜晚變得冷清，曾俊華對此感到可惜。他表示，疫情加上串流平台的迅速發展，「似乎改變咗香港人夜蒲嘅習慣」，現在大家都習慣早回家，街上好多食肆店舖夜晚10時就結束營業，「連以前人來人往嘅女人街都冷清咗好多，真係好可惜」。