梁釗峰出新歌 Hazel做MV女角眼淚決堤

梁釗峰（釗峰）今年第二首派台歌《愛情難以許可我們回到當初（1717）》目前已上架。MV由19歲林熙彤（Hazel）與20歲何求，演繹青蔥校園愛情故事，其中何求哭到眼腫，Hazel更一度眼淚決堤，令梁釗峰和何求手足無措。

梁釗峰今年重點推出音樂映像企劃「遺憾與遺憾之間的一切」，以「遺憾」為主題，包括4首作品，每首歌MV都由郭爾君（Alma）與釗峰飾演「遺憾整理師」，處理不同關係之間遺憾。第二首歌《愛情難以許可我們回到當初（1717）》的MV，由兩位新晉演員Hazel與何求飾演一對情竇初開小情人，現場布置成中學校園，他們與20多位「同學」慶祝畢業，互相在校服上寫留言和畫公仔、放紙炮，還手拖手跟著同學在走廊追逐，甜蜜溫馨。

惟鏡頭一轉，兩人隔著大門飲泣，而導演叫Cut後Hazel的眼淚仍停不了，令何求和釗峰兩位男士手足無措，只能陪在她身邊和遞上紙巾，導演Veronica見狀亦上前擁抱安撫。

梁釗峰新歌MV女主角Hazel林熙彤，拍攝期間眼淚決堤，導演叫Cut後仍停不了。（寰亞娛樂提供）

釗峰受訪時指，「好開心喺一個咁靚嘅地方，拍攝新歌MV，呢首歌係企劃之中第二個章節嘅歌曲。導演Veronica好厲害，搵到Hazel和何求演出，佢哋演得好好。故事講何求喺校園被欺凌，期間遇到Hazel嘅故事。因為唔係順拍，何求要因應不同階段與Hazel嘅關係，影響佢點樣演繹，尤其是有幾場喊戲，每場嘅情緒都要拿捏得好準確。」

至於Hazel，釗峰坦言先被她之前拍的硬照吸引，他續說：「佢對眼識演戲，會表達，令人好有感覺。」釗峰又讚她與何求雖然演戲年資淺，但很懂事，「我透過鏡頭睇佢哋演出，發現佢哋技術好成熟，無論面對機位、散發出嚟嘅感覺，好快到位，而且效果好青春。」釗峰又透露，他與Alma飾演另一個空間的Hazel與何求，穿越時空來到現實為他們修補遺憾，雖然他們只亮相一幕，卻是故事關鍵。

MV由Hazel與何求演繹青蔥校園愛情故事。（寰亞娛樂提供）

Hazel則說，第一次聽劇本時兩人已忍不住哭，「好觸動到情緒」。何求亦表示：「我見到佢喊，我又喊，打開咗個心扉。」Hazel笑問何求：「你係咪中學有一段難忘嘅愛情故事，所以喊得咁慘？」何求辯稱「我代入感比較強啫！」，又反問Hazel「係咪都有一段可歌可泣嘅愛情故事呢？」Hazel就解釋自己作為演員好有想像力和代入感，又讚「導演講故事嘅時候好生動，令我好似睇戲咁，成個畫面都出晒嚟。」

釗峰亦感激新歌創作團隊，「多謝今次作曲人Tommy，首歌好有青春氣息，而佢喺監製過程中指導我，要我拎走啲嘢，將把聲變得好乾淨。而填詞人Riley（林若寧），佢按照『遺憾與遺憾之間的一切』企劃整個故事嘅脈絡、呢個章節嘅人物性格和信物，寫入歌詞，令我錄歌時更容易投入。而歌詞中『多謝你』呢3個字，令我諗起另一首歌《閃亮的青春》，將來開騷，呢兩首歌係可以發生一啲關係。」@