朋友問我香港特色麵食除咗車仔麵、魚蛋粉之外重有咩？我話重有（細蓉）雲吞麵。
一碗熱騰騰嘅雲吞麵，充滿香港情結，可以話係伴隨著港人長大嘅食物，雖唔可以話必不可少，但都不可或缺。雲吞麵店遍佈香港大街小巷，一碗雲吞麵由三部份組成——湯底、竹昇麵（或麵條），重有面頭嘅雲吞。任何一個部份唔夠味，都會令成碗麵失色。
先講湯底，主要用豬骨、大地魚和蝦子熬製，有啲餐廳亦會加入一啲自己嘅獨門秘方。湯底要鮮甜，清而不膩。麵嘅傳統做法係自家製嘅竹昇麵，不過竹昇麵要全人手製作，成本太高，所以依家好多麵店都外購麵條。
不過一碗雲吞麵嘅焦點始終都集中係雲吞度。講起「乒乓波咁大粒嘅雲吞」，夠特色喇啩！呢個係沾仔記招牌！沾仔記嘅雲吞可以話係我由細食到大嘅。去開佐敦行街，我都會幫襯，食番碗淨雲吞。
上星期咁啱同朋友去佐敦行街，順便帶佢去食，一如以往舖頭係獨沽三味：雲吞、鯪魚球同埋牛肉，除咗雲吞麵我仲叫咗鯪魚球麵畀朋友試吓。
其實我好嘴刁，鹼水味濃嘅麵、肥豬肉雲吞，或者厚皮雲吞我一概唔食！始終我對食物有要求，尤其呢種伴隨我長大嘅港式美食，食勻大街小巷後，自然搵到啱心水嘅餐廳。
位於廟街的沾仔記係間十幾年嘅老店，同其它同名麵店唔一樣。舊式經營，一周開6日，星期日全日休息。舖仔細細，餐枱唔夠十張，可容納嘅食客數量唔多。同其它舊式粉麵檔一樣，店內陳設有啲破舊。雖然環境麻麻，坐得唔算舒服，但一樣好多人幫襯！店舖老員工服務友善，同街坊街里相處融洽。
唔使好耐，我地嘅雲吞麵就嚟到，朋友好驚訝，話佢真係第一次見乒乓波咁大粒嘅雲吞。同樣，鯪魚球都一樣係大大粒。望到都覺得開心，頓時胃口大開，食慾大增。一啖咬落去，雲吞入面全部都係蝦，用料足，蝦多豬肉少，入口爽口彈牙。鯪魚球入口煙韌，唔同市面好淋、好粉、咬落冇質感嗰啲。麵都幾爽口，鹼水味唔濃。湯底清淡，冇味精。
麵嘅份量女仔一定夠食，大隻佬可能要叫2碗先夠飽。如果未夠，可再配個油菜加枝支裝汽水，實會好滿足。而且麵店重有生嘅雲吞可以買走，買幾打返屋企淥麵打邊爐一流。◇
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
