每次經過K11都會見到三田製麵所，佢喺幾年前由日本進軍香港嗰陣，日日都大排長龍我聽到都驚，依家熱潮已過，穩定咗，分店又多咗，方便好多，上星期六我都終於去咗試。
由窗口就望到佢部製麵機製緊麵。為確保質素，製麵機都係由日本運過嚟，麵條每日新鮮製造。
餐廳麵嘅選擇種類唔多，主打沾麵，自家製極粗麵配上特濃沾汁，特濃沾汁強調用大量豬骨、雞骨、蔬菜同魚介等材料，用猛火熬製超過12小時而成。沾麵有冷熱選擇，冷食係最正宗嘅，麵條入口會更加爽口煙韌。
呢度沾麵大中小份量同價，份量分別係140g、210g、280g，而無論幾大碗麵沾汁都係一樣份量。
我點咗一碗沾麵（大）、一碗辛辣三田拉麵（中）加兩款小食分別係炸雞翼（黑胡椒味）同芝士蝦球。
首先上嚟嘅係沾麵，我先試一口沾汁，沾汁好濃、略鹹但好鮮味，可惜唔夠熱，上枱時嘅溫度已經可以即刻飲落口，一般沾汁係需要熱到燙口嘅程度，尤其沾麵係凍嘅話，沾汁必須要夠熱先最好食。
沾汁裏有叉燒粒，叉燒粒吸晒沾汁係好味但唔夠嫩滑。到沾麵喇～沾麵入口有微微小麥麵香，煙韌順滑有咬口，好食！
碗內有一塊叉燒，半隻糖心蛋加幾條筍條。叉燒乾身食落有啲嚡，點汁會食好啲，溏心蛋見到蛋黃一半呈啫喱狀食落都唔錯，筍條清淡食落冇渣。
由於沾汁濃厚杰身掛麵，所以大碗食到尾會唔係幾夠沾汁，好彩我慳住可以食到最尾，（返嚟聽朋友講原來雖然唔可以加沾汁，但可以加湯割，不過諗返現場見唔到湯壺，亦都冇人提點，大家下次可以試下主動問佢哋。）
辛辣三田拉麵就係一般拉麵口感，辛辣度一般，都係配叉燒、筍條，不過冇蛋，雖然係中份量都好大碗吓㗎！
黑胡椒味炸雞翼以為係辣胡椒味，但出奇地入口係甜嘅，甜味完全蓋過黑胡椒嘅味道。
芝士蝦球咬開裏面係軟身芝士嚟，幾彈牙爽口。後來點嗰杯蜂蜜綠茶就淡而無味。
雖然佢格局唔似要加一嘅餐廳但係收加一㗎！沾麵真係好食，我諗我會再去食，下次仲會食得醒目啲試埋佢嘅湯割添！◇
三田製麵所
地址：尖沙咀河內道18號K11地下G21-22舖
米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com
------------------
📰支持大紀元，購買日報：
https://www.epochtimeshk.org/stores
📊InfoG：
https://bit.ly/EpochTimesHK_InfoG
✒️名家專欄：
https://bit.ly/EpochTimesHK_Column
