尖沙咀嘅DIM SUM ICON經常都會轉換唔同嘅卡通人物主題點心,今期嘅主題就係我細細個好鍾意睇、人見人愛嘅Garfield加菲貓,今年剛好亦係佢踏入40歲喇!所以今次就以加菲貓為主題。

平時幾乎日日都大排長龍,但遇啱新年兼且大年初三,人流就比較少,我同啲朋友去到好快就有位。門口望去店內四圍都係加菲同阿的,門口仲有一個紙板公仔畀食客影相,大人小朋友都影得好開心。餐牌設計同點心賣相都好得意,連餐墊同筷子套都係加菲貓嚟㗎!打開餐牌真係幾乎想所有點心都點一個嚟試,因為實在係太得意可愛,哈哈!

我哋一行三人總共點咗九款點心連飲品,包括 Garfield and Friends蝦餃, 加菲大頭西多士、古惑煎蛋糯米雞、加菲榛子馬拉卷、木乃伊尖椒、鮮蝦炸雲吞、原個菠蘿炒飯、香水菠蘿特飲同埋香橙沙冰。

 

點心一上枱我就想立刻拎起放入口,但係為咗大家點都要忍住新鮮熱辣放入口嘅衝動讓畀相機食先啦!

影完相拍完片真係食得喇~首先試嘅係榛子馬拉卷,馬拉卷口感比較結實,似甜鬆糕而榛子味就唔突出冇咩特別。跟住試西多士,西多士係大頭加菲超得意。上面係糖霜曲奇,平時嘅糖霜曲奇係甜到得人驚,呢塊入口時都驚驚哋細細啖試吓,一試有驚喜,糖霜曲奇出奇地唔係好甜仲好脆,真係唔錯幾好食。西多士炸得金黃一切開裏面原來係流心奶黃餡,入口充滿鹹蛋黃香味,配合清甜嘅蜜糖,冇錯唔係糖膠係蜜糖,味道真係冇得頂,所有點心之中最出色係佢。蝦餃嘅皮有少少韌但係蝦肉好爽甜,蛋煎糯米雞上面係一大片厚切煎蛋。木乃伊尖椒係好爽嘅蝦肉配爽脆尖椒外包炸條,每隻配上一對眼好得意,炸雲吞又係每件貼一對眼好搞笑,裏面都係爽甜嘅蝦膠,外面炸得金黃香脆食落唔油膩。菠蘿炒飯就麻麻地飯有啲硬,但係佢好有心思將菠蘿頭葉做成一隻鸚鵡,好靚㗎!

Garfield and friends蝦餃
Garfield and friends蝦餃

古惑蛋煎糯米雞
古惑蛋煎糯米雞

 

加菲大頭西多士
加菲大頭西多士

木乃伊尖椒
木乃伊尖椒

鮮蝦炸雲吞
鮮蝦炸雲吞

加菲榛子馬拉卷
加菲榛子馬拉卷

好得意嘅菠蘿炒飯
好得意嘅菠蘿炒飯

飲品就係香橙沙冰,插住香橙沙冰嘅獨角馬好得意,沙冰面有椰果粒,我就覺得香橙得嚟帶少少藥水味。香水菠蘿特飲真係真材實料,原個香水菠蘿上枱裏面仲有菠蘿蓉,好好味價錢又合理,抵過去甜品店飲溝糖水嘅菠蘿汁呀!

香橙沙冰
香橙沙冰

食咗咁多嘢埋單連加一, 四百幾,埋完單仲有個靚靚嘅加菲貓杯墊送,我哋每人都食到好飽捧住肚走。年假期間幾乎所有酒樓都加二加三,真係食呢個點心仲抵過去酒樓食點心。一如以往今次加菲貓主題都係期間限定,加菲迷一定唔好錯過,唔係加菲迷都食得過!記得避開公眾假期同繁忙時間就唔使大排長龍等好耐!

今日係大年初六米芝Gi祝大家新年快樂,身體健康,日日有食神!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com