上星期Happy Friday入咗大埔食魚蛋粉,欽記可以話係全港數一數二好食嘅!以前喺舊墟大排當嘅時候已經好多人專登去幫襯,亦都好多明星走入去食㗎!印象中記得老闆同員工都好有性格㗎,每朝早早開到2點就收,賣完就收唔會通知客人,又不設外賣,想帶走要自己帶食物盒,你埋去佢只會同你講一句:呢度只賣魚蛋粉唔好問有咩賣!有性格到呢!佢由當年嘅大排檔搬咗上去熟食中心後我第一次去,覺得又別有一番風味了。

欽記魚蛋粉。
欽記魚蛋粉。

欽記魚蛋粉。
欽記魚蛋粉。

去到熟食中心好熱鬧好多街坊好多好熟悉嘅嘢食,都係一齊從舊墟搬去嘅,有即拉腸粉、砵仔糕、點心、蒸飯、粥品真係咩都有㗎!不過我一心入去係食魚蛋粉嘅梗係即刻去欽記坐低先。

點咗一碗麵一碗河粉(記住佢係獨沽一味魚蛋粉麵),一入口係久違了嘅味道,魚蛋魚片好鮮甜,好濃郁嘅魚味咬落有少少魚骨碎,另外炸魚皮炸得金黃卜卜脆好香好香魚皮味,超級驚喜!真係美味到難以形容停唔到口,冇一間及佢呀!每碗兩件真係唔夠喉呀~唯獨河粉比較嚡口麵太林,不過去得食粉麵只係配角,魚蛋先係精髓。食食吓隔離蘇記就來熱情咁問飲咩,又推介多士,好warm呀,叫咗杯熱奶茶,奶茶唔錯,有茶味唔澀幾滑㗎!

食完再去洪記試吓,聽講洪記都唔錯多人食,坐低叫咗一碗河粉加一碗淨魚蛋,佢魚蛋冇咁鮮甜魚碎骨再多啲冇咁彈牙,魚皮炸得比較硬,油唔夠新有一陣油味。但係洪記好好人好友善,仲叫我唔好咁急畀錢食完先慢慢來,真係好有家人feel㗎!

洪記魚蛋粉。
洪記魚蛋粉。

洪記魚蛋粉。
洪記魚蛋粉。

去到熟食大樓全部都係街坊街里好熱鬧,食物又集中,舊時左鄰右里嘅感覺返曬嚟,呢啲真係我哋香港嘅地道風味,真係食得好開心㗎!大家有機會去感受吓嗰種人情味啦!記得要食就要早呀!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com