本地多個電視台和傳媒機構均有派員到法國直擊巴黎奧運，其中TVB多次獲得重要的獨家訪問成近日熱話。曾經於TVB擔任體育記者多年的資深傳媒人伍家謙近日於社交網站撰文，大談採訪秘聞。
伍家謙日前於Facebook撰文，談及TVB近日接連獲得獨家訪問一事：「網上見到有人問，點解有啲台可以做獨家訪問先？喺呢個問題上面出現好多猜測：係咪夾硬夾走個運動員呀、係咪個受訪者自己揀呀、係咪有指定要答邊個先呀……睇完先醒起，呢啲有關採訪同製作嘅嘢，一般市民大眾未必知道；與其估估下，咁啱小弟又現場採訪過兩屆奧運，就一於當做冷知識咁寫下。」
伍家謙表示，大眾看到傳媒採訪時看似混亂，但當中其實甚有秩序：「奧運嘅採訪，有規有矩，不得亂來。邊度可以拍片、邊度可以影相、邊度做得訪問，全部清清楚楚；有啲地方影得相唔拍得片，而齋做文字訪問嘅區域就直頭連攝錄器材都唔攞得出嚟。如果喺唔適合嘅地方拍嘢，影咗都唔出得，因為會畀國際奧委會告；輕則口頭警告，重則取消成屆嘅採訪資格」，他補充指，真的有機構被取消過採訪資格。
伍家謙續解釋，一個比賽場館內唯一合法訪問的區域叫做『混合採訪區』(mixed zone)，所有完成比賽的運動員必須經過這個區域才能回到更衣室。不過是否接受訪問，選擇權就在運動員手上。「試想像下，超級體壇巨星，全世界記者都想問；如果個個都答，佢可能行一世都未走得出個mixed zone，膀胱爆埋都未返到去驗尿做藥檢，所以，佢哋多數會選擇答頭幾個、有啲見到相熟/嚟自自己地方嘅記者就停低、有啲做完一定要做嘅訪問就直行直過」。
他又提到自己為何崇拜費達拿，因為他「真係逐個逐個記者答」，並憶述倫敦奧運時，費達拿在自己前面走過，本來以為無功而返，豈料費達拿答完下一個記者後回頭笑說：「Sorry呀頭先miss咗你，你有咩想問呀？」，伍家謙感嘆：「呢個級數嘅運動員，真係得佢會咁做」。
伍家謙又透露，除了一些固定的採訪資格外，亦有其他公開的「霸位」方式，當中包括「畀錢」：「喺呢個前題下，排得越前當然越著數啦。一般嚟講，排第一嘅一定係國際奧委會嘅channel，而且規定咗運動員一定要答；排第二嘅就會係主辦城市嘅個國家嘅官方電視台，至於之後嘅排位就開放自由競逐。競逐方法有兩種：一，畀錢；二，鬥早。」
他續指：「畀錢最簡單直接，只要肯科水畀國際奧委會，個位幾靚都有。入面光纖電掣乜都齊，而且只有你一間專享，其他人想入都唔入得；服務同價錢成正比，所以有意買位嘅電視台會係事前plan定，邊個場館最有機會攞獎，邊個運動員一定要問到唔可以甩，先至決定畀錢買嗰個場館入面嘅mixed zone位」。
「至於一啲筆直少啲，又或者肯畀錢不過抽唔到（嗰啲採訪位數量有限，好多時每個國家/地區都只得一兩個名額，超額就要抽籤，肯畀錢有時都要講下運）嘅電視台，就只能夠叫隊crew早啲入場，希望霸到較前嘅採訪位置喇。嗰啲位一定會排喺畀咗錢嘅人後面，都真係幾後下；又因為嗰度所有記者都入得，亂起上嚟係會同打仗一樣，迫到飛起。其實行到嚟到呢度嗰陣，個運動員可能已經答咗同樣嘅問題幾十次，一般好少停低。」
伍家謙又表示，香港運動員都對本地記者十分友善，幾乎是有問必答：「不過，我哋嘅運動員係好好嘅，見到香港記者，幾乎一定會答；下次睇訪問，大家見到有台一個人單頭問先，有啲就幾十個咪牌堆埋一齊，大概就知咩事。」@
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
