被提名「全球百大俊男」 黃偉文發退選聲明︰非我性格亦非我所求

「我係無份用任何方式『搞』自己入去呢個名單嘅。」著名填詞人黃偉文（Wyman）27日被美國網站提名「全球百大俊男」，他知悉後發表聲明，說自己不知情並無心參選。「非我性格亦非我所求，唯獨呢件事一定要講清楚。」他並且提出退選要求。

被惡作劇一下疫情中提供一點歡樂

3月27日，美國網站TC Candler公布再有香港人入選「全球百大俊男2022」，時尚達人、著名填詞家黃偉文（Wyman）入圍。收到好多網民恭喜時，Wyman才知自己「被入圍」，昨日（27日）在社交網站發聲明，澄清自己並不知情。

「首先，成件事我並無『參賽』完全被動，被題名咗都唔知咩事。」但Wyman亦表示，「陪大家開個玩笑，被大家惡作劇一下，喺疫情中提供一點歡樂，我係ok嘅。」

Wyman強調此「參賽」非自己性情所為，「我係無份用任何方式『搞』自己入去呢個名單嘅，非我性格亦非我所求，唯獨呢件事一定要講清楚。」他也趁機幽默自己一番：「請大家各適其適，繼續enjoy呢個玩笑（自己知自事，我諗唔會唔係玩笑而真係有咁多人覺得我有機會成為全球百大美男啩？哈哈哈！）」

點出心中疑問：入圍人數會唔會有幾百萬個？

TC Candler今年獲不少香港人關注，因為男子組合Mirror全體12名成員（鏡仔），及男子組合ERROR全部4名成員（錯仔）都入圍。

不過Wyman就嚴肅提出退選要求，「不如大家笑過就算，尊重吓我意願，俾我退選啦唔該！」之後他並以hashtag強調心聲及心中疑問：「#真係唔駛恭喜我啦喂！#我貪呢啲嚟做乜唧？#我好想知究竟呢個選舉係咪有一個人提名就得㗎啦？#其實到最後入選呢個名單嘅人數會唔會有幾百萬個㗎？#真正最想問係有冇得唔接受提名要求有關方面將我除名㗎？#等其他實至名歸嘅人去選啦！」

據TC Candler今年公布的入圍規則，網民可透過官方YouTube頻道提名，惟未必保證入圍；另一種方式是今年新增的「課金方案」，網民只須加入官方Patreon，最低25港元月費，其提名就能保證入圍。若選擇最貴80港元月費，且訂閱6個月，更有最後投票權。

有網民留言：你美在歌詞裏

Wyman po 文後，有不少網民留言，有人認為Wyman的才華和時尚感完全勝任，「你走在潮流嘅尖端梗係入圍啦！」亦有人安慰：「Wyman, 明白你的『被動』，實在以你的才華及fashion sense當之冇愧；不過我會專重你的意願，投票俾我偶像#姜濤，別擔心！」、「說真的，其實你美在骨子裏，美在歌詞裏。一個人的美，不只是外貌；外貌可以整容 / 包裝，但內心的美，是無價及珍貴的。」

有網民則覺得課金方式獲得入圍資格令人尷尬：「呢啲用課金方法令人入圍嘅選舉，其實令當事人好老尷，一定要表明立場！有料大家知就得，要課金就seven咗！」亦有網民說「其實我都想知入圍名單有幾多個，當12個鏡仔，再加4個錯仔全部入晒圍，呢個選舉結果已經唔需要睇得太認真，我地當然知道你唔會自己提名玩自己喇，要玩都唔係而家先玩喇，定係你想我地記得『係咪玩嘢』先」、「笑死，喂呀，有得同鏡仔錯仔爭，好威架，Enjoy下啦！」

儘管Wyman強調唔好再恭喜佢，但有網民仍忍不住講：「其實你入圍，是香港人的愛呀，要給世界知道，香港這個地方，有這麼多靚人，和有才華的人，恭喜你！」@