鄭伊健「HERE & NOW EKIN IN CONCERT 2024 LONDON」當地時間7月6日晚上,在英國倫敦Eventim Apollo舉行,兩度encore,歌迷反應熱烈,伊健感動3度唱到眼濕濕,唱《我的歌》時他強忍淚水繼續唱。填詞人黃偉文(Wyman)當晚亦是座上客,伊健指當年低潮時獲Wyman《新歌》不明所以,但15年後的今日再睇歌詞時被感動了。

伊健當晚率先多謝大家捨棄歐洲國家盃賽事入場睇自己:「我第一次英國開騷,好難得,多謝你哋選擇唔睇波,嚟睇我演唱會!」。之後整晚演唱會就如同「大型K房現場」一樣,無論伊健唱《友情歲月》、《一生愛你一個》、《感激我遇見》等冧歌,還是《極速》和《自動勝利Let's Fight》等快歌,都全場觀眾大合唱。連小師妹黃淑蔓Feanna唱伊健出道檸檬茶廣告歌時都跟住唱,伊健見狀即興重演廣告情節和經典對白,台下尖叫聲不斷。

相識三十年、寫過多首歌俾伊健的黃偉文Wyman作為座上客,伊健除了唱出《Beautiful Day》、《吻感》、《心照》、《發現》和《我的歌》等多首出自Wyman的作品外,亦憶起2009年往事:「其實佢寫咗好多畀我,頭先我都唱咗好多首都係佢填詞。但呢首歌好特別,叫做《新歌》,我唔知大家有無聽過,因為嗰陣時我低低地潮,有新作品都未必咁多人知道。」

伊健指當年自己都唔明當中的意思,但今日回看終被歌詞感動眼濕濕:「點解叫《新歌》?當年我睇歌詞問點解,點樣『新嘅我』?嗰陣時理解能力有限。但今日攞返首歌出嚟,我同陳光榮講:『嘩,原來呢首歌唔係講我喎,係講一個人生。』我唔識講,不如唱啦!」

演唱會最後一首歌《Together》時,伊健說:「做人要開心啲!」舞蹈員帶埋幾袋crew tee「手信」出場,與伊健一齊拋入觀眾席,全場興奮站起來,非常熱鬧。當然唔少得Encore環節,伊健再度出場唱《動地驚天愛戀過》時,台下歌迷全部站起來,揮動手機燈,他又再眼濕濕更一度哽咽,觀眾歡呼聲和掌聲打氣。

他說:「所有歌真係唱晒,導演叫我出嚟唱多首歌。點都好,多謝你哋,無離開,Thank You!我演唱會有個特點,就係希望大家開心,所以點都要加多隻歌。希望大家開心咁離開呢個地方,記得我哋今日聚過,希望後會有期。」之後伊健將於本周六(13日)到馬來西亞雲頂繼續巡唱見歌迷。

Wyman在IG先後出了3個帖,分別與林珊珊、陳光榮和鄭伊健合照,細數與他們認識的點滴。其中他表示好欣賞伊健:「相識接近30年,從來未試過同枱食飯,相熟程度自從我冇做DJ嘅1998年開始,一直以『每5年傾到3分鐘偈』嘅速度爬行,但冇壓力,因為冇預定要去嘅目的地。亦完全無損『工作時互相信任、做人時互相尊重』嘅優雅距離,係,即係有距離,但係係優雅嘅。欣賞嘅人,唔使個個都做到好朋友嘅。我欣賞佢咩?佢係我識得嘅人裏面,其中一個『最初心』『最無被世界改變嘅人』。」

至於陳光榮,Wyman公開要求他舉行作品展:「陳光榮先生,你快啲搞作品展得唔得?你啲好歌都儲夠有凸啦!」(見早前報道)@

鄭伊健「HERE & NOW EKIN IN CONCERT 2024 LONDON」在英國倫敦Eventim Apollo舉行,唱出多首港人擁有集體回憶的歌,包括《友情歲月》、《一生愛你一個》、《感激我遇見》等。(寰亞集團提供)
鄭伊健「HERE & NOW EKIN IN CONCERT 2024 LONDON」在英國倫敦Eventim Apollo舉行,唱出多首港人擁有集體回憶的歌,包括《友情歲月》、《一生愛你一個》、《感激我遇見》等。(寰亞集團提供)

鄭伊健「HERE & NOW EKIN IN CONCERT 2024 LONDON」在英國倫敦Eventim Apollo舉行,唱出多首港人擁有集體回憶的歌,包括《友情歲月》、《一生愛你一個》、《感激我遇見》等。(寰亞集團提供)
鄭伊健「HERE & NOW EKIN IN CONCERT 2024 LONDON」在英國倫敦Eventim Apollo舉行,唱出多首港人擁有集體回憶的歌,包括《友情歲月》、《一生愛你一個》、《感激我遇見》等。(寰亞集團提供)

------------------

📰支持大紀元,購買日報:
https://www.epochtimeshk.org/stores
📊InfoG:
https://bit.ly/EpochTimesHK_InfoG
✒️名家專欄:
https://bit.ly/EpochTimesHK_Column