【米芝Gi周記】馬鞍山玻璃屋造型café

我好鍾意光猛舒適嘅餐廳，最好係有窗可以透到天然光，咁就坐得舒適又寫意，可惜香港唔單止樓價驚人，連租金都一樣高到得人驚，所以好多餐廳特別係新式嘅都係細細間好骨子但冇窗，而且為咗營造氣氛通常燈光都調得比較暗。

最近竟然畀我發現到呢間又大又多窗重要超高樓底嘅餐廳，佢唔單止好大間重有好多唔同嘅坐位，四周圍都好有特色，餐廳面積好大兼有一整排全落地玻璃，而且重有日式榻榻米座位添！由出面望入去成間玻璃屋仔咁，真係好襯佢嘅餐廳名「屋子生活」。我梗係第一時間約埋朋友仔去試吓啦！一走入去立刻揀咗張窗邊嘅榻榻米來坐，超大嘅落地玻璃無遮無擋望出去視野非常廣闊，天然光透入嚟微暖感覺好舒服，餐廳好貼心每張枱嘅地下都會有插座，我亦都見到有一枱坐住兩個學生開住notebook一齊輕鬆做功課，有插座就唔怕電子產品冇電啦！

餐廳有一整排全落地玻璃，而且重有日式榻榻米座位添！由出面望入去成間玻璃屋仔。

放喺枱面上嘅餐牌都好有特色，係練習簿做成兼且後面仲有九因歌添！打開裏面除咗食物名稱之外重有手繪嘅圖畫，真係好得意㗎！裏面重指示埋邊啲係人氣食物，我哋點咗兩個人氣套餐加一個沙律同兩款甜品。

先上來嘅係公園沙拉，佢醬料係日式沙律醋幾開胃，沙律菜新鮮度唔夠，番茄入口新鮮爽甜，豬肉有啲嚡。跟住就係宮城明太子飯糰+值日飯團餐，同埋七味雞唐揚定食。飯糰味道冇咩特別，七味雞炸得皮脆肉嫩，配埋七味粉味道更突出，好食！跟餐嘅麵豉湯好濃郁，鐘意飲麵豉湯嘅朋友實鍾意！

公園沙拉。

宮城明太子飯糰+值日飯團。

宮城明太子飯糰+值日飯團餐，套餐有配一個沙拉。

七味雞唐揚定食跟餐嘅麵豉湯好濃郁，重有一碗加咗日式飯素嘅白飯。

七味雞炸得皮脆肉嫩。

蘋果茶（左）及抹綠奶茶。

重有呢間餐廳出名好食嘅甜品喇！甜品我呢個甜品控一定唔會錯過，先試食綜合鮮果窩夫配柚子雪葩，柚子雪葩上用鮮果做砌成一個公仔臉咁好得意，窩夫外脆內軟有蛋香，柚子雪葩好香柚子味真係超好味。

柚子雪葩上用鮮果做砌成一個公仔臉。

最後係剛焗起就立刻上枱脹卜卜嘅伯爵紅茶梳乎厘，配上香草雪糕，梳乎厘好香伯爵茶味甜度適中，香草雪糕內有新鮮雲呢拿籽，好味！佢啲甜品真係好出色，嚟到一定要食呀！

爵紅茶梳乎厘配香草雪糕。

米芝Gi鍾意飲飲食食，對食物質素絕對有要求， 食勻港九新界大小特色餐廳、街頭特色小食；對於市面上嘅新事物，不講論健康生活，扮靚潮流資訊佢都會留意去嘗試，有好嘢正嘢筍嘢鍾意開心share，係地道港女一名！ 依家佢藉機會將愛好分享畀大家。如有好嘢正嘢想同米芝Gi分享，或者查詢及反饋，請email：micgigidjy@gmail.com

----------------------
🎯 專題：中共海外升級攻擊法輪功
https://hk.epochtimes.com/category/專題/中共海外升級攻擊法輪功
----------------------
【不忘初衷 延續真相】
📰周末版復印 支持購買👇🏻
http://epochtimeshk.org/stores

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand