相關文章

呢個猴年好熱鬧,重未開始金同志就除夕放衛星,搞到日韓呱呱叫;阿爺出奇大反應,又譴責又交涉(呢次燒到埋身唔出聲都唔得),但表態唔想經濟制裁北韓(話怕有難民潮湧入中國,咁都得?)周一只要有盤開D市場都腳軟,都未話有乜進一步行動就反曬肚,好似跌過左籠;話口未完南韓向北韓隻船開火驅趕,個市要反彈真係想都唔好想。上星期提過金價可能短期見底反彈,果然在金同志除夕表演影響下應聲彈起(唔通又有人事先知道)。而家最尷尬就係韓日只要一裝老美套防禦系統,就隨時有可能擦槍走火,唔裝又怕唔安全,萬一出事散戶又要捱沽(家陣都搵錢至上,打仗肯定唔會)。美國最近數據靚仔,除左非農數據出乎意料差左,其它數據都支持三月加息,但會後聲明同非農都傾向鴿派,唔支持短期加息;睇大盤就好似頂唔住,加息後無段好睇,越落越有,關鍵在美匯指數破唔到頂,100都企唔穩,升值預期唔夠,D錢又點會急住去買貨,但小心係老美個局,等美匯空倉夠多,一劑挾爆淡倉,用補倉盤推高美匯,引發資金回流扯高股市(呢兩日外匯市場美元匯價好似沽唔落)。特朗普在黨內初選剛下一城,如果最終俾佢坐正,阿爺明年呢個對手都好難搞。德國財長話德國可以在15-16年度會完全消滅赤字,默師奶掌政10年功不可沒,雖然難民問題引起國民不滿,但德國無默師奶就無今日,相信國民重會想佢連任,繼續呢種好日子。歐洲銀行股價屢試新低,德意志銀行創金融海嘯後新低,瑞士信貸銀行跌落24年新低,投資歐洲市場睇怕都係遠離金融類股票好D,由於整體經濟復甦(起碼最壞時間已過),零售和服務類股份可以優先考慮。香港年初一就出大事,但好奇怪,國內媒體對呢件事報道得好低調(唔通怕影響過年氣氛?)。上星期先話左期權個位做得好低,點諗都諗唔到會咁淡,點知內憂外患(北韓加上旺角事件)一起到,大家扣好安全帶坐翻轉過山車,18,300守唔住就17,200見,國指關鍵位7,300。阿爺過年放假無特別。

呢期輪到隻嘉里建設683,集團擁有三大業務板塊,包括物業銷售,出租同物流(已分拆嘉里物流636上市)。關於物流業務對集團利潤的貢獻可以忽略,因為波羅的海指數一直低完再低,幾時蝕本幾時穩定都唔知;租金收入將會係集團賣點之一,對比SOHO中國優勝地方在於擁有酒店業務,但大部份都在國內,同樣要面對經濟下行,人民幣貶值的不利因素。最近財報顯示租金收入有低雙位數增長;物業銷售方面錄得倒退,金額同毛利都高雙位數下跌;加上集團每年淨利息支出接近10億,派息率唔高同時國內經濟開始加速下行,集團更要面對相當高匯兌風險,包括美元轉強後造成美元和港元的債務利息支出增加,主營業務收入的減少,重有房地產市場下跌預期,雖然現時每股資產值約56港元,綜合各個不利條件後,每股合理值應該在20左右,在14元附近可以考慮買入。

下星期講隻和美醫療1509

讀者有任何交流的,可以發電郵至 fundsniper@yeah.net,大家多作交流。( 以上觀點僅為個人對市場的看法,並非任何投資勸誘或建議。)◇