昨日(15日)是歌手陳健安(安仔)的38歲生日,亦是他首張彩膠唱片《Life afteR Life》面世的大日子,安仔表示選擇在生日出碟的原因,是希望永遠記得人生第一張彩膠碟的推出日期,亦希望歌迷能夠在明日(16日)的音樂會和周六(20日)的歌迷慶生聚會前收到唱片,非常貼心。
《Life afteR Life》彩膠唱片共收錄10首作品,與同名大碟收錄13首歌有所不同。安仔解釋:「黑膠主要收錄最原汁原味嗰10首,因為佢嘅容量有限,所以《厭惡物圖鑑》合唱版同埋《仍然是那個少年》、《好好掛住》嘅另一版本,就要喺CD先至聽到。」
彩膠封面是安仔靠在綁有拼布的椅子上,拼布上的每一個圖案都代表着他的過去。安仔指着布上圖案逐一解說:「《創作者的派對》同歌迷玩咗一個遊戲,我畫一筆,佢哋再不停畫上去,我第一張專輯《本原》嘅封面都包咗喺張凳上面。呢張碟嘅概念係,『你嘅過去成就而家嘅你』,痕跡疊痕跡,我依靠住呢啲過去成就而家嘅我。」
細心一看會發現這張封面照,甚至內頁的照片都與同名大碟略有不同,他說:「CD封面會見到好多唔同Layer,一層一層咁。彩膠就係騷晒成個Setting出嚟,放大係會睇到凳上面嘅圖案。放大版本嘅感覺好唔同,睇到好多Details。」
至於彩膠內頁就跟同名大碟一樣,記錄了每首歌的「出世紙」、每位創作人當下的想法,安仔形容就如日記般寫下每首歌的創作點滴。當中亦收錄了一些金句,安仔更將其中的「The meaning of life is to find your gift. The purpose of life is to give it away.」紋在右手手臂內側。他說:「我嘅禮物就係我嘅感受,然後用音樂嘅方法送出去。」
彩膠內頁收錄了安仔小時候與父母的合照,勾起了他不少童年回憶:「阿媽抱住我,呢張相喺屯門市鎮公園影。嗰時佢抱住我周圍去,而家到我帶佢去旅行。」
近年經常與媽媽去旅行的安仔表示:「細個阿媽帶我去好多地方,好多嘅第一次都係佢帶畀我,大咗覺得自己有能力就想做返呢個角色。」他剛剛與媽媽去完福岡旅行,並透露每次都會挑選雙方都未到過的目的地,希望可以共同感受所有的「第一次」。
他笑說:「今次發現佢係第一次玩鞦韆,仲有即興一齊玩摩天輪。嗰日去完一個島,睇睇時間仲有半個鐘就日落,望一望對面有個摩天輪,就問阿媽玩唔玩,佢話『唔玩啦』,因為之前去旅行試過話70歲以上唔畀玩,可能日本冇限制,就即興同佢玩摩天輪,撞啱時間一邊睇日落一邊玩摩天輪,好多第一次好開心。」人生第一張彩膠唱片,安仔當然有預留給媽媽,還表示會為對方簽名。@
------------------
📰支持大紀元,購買日報:
https://www.epochtimeshk.org/stores
📊InfoG:
https://bit.ly/EpochTimesHK_InfoG
✒️名家專欄:
https://bit.ly/EpochTimesHK_Column