第十一屆微電影「創＋作」支援計劃（音樂篇）昨日（3月14日）於會展舉行頒獎典禮暨精選作品放映，黃淑蔓（Feanna）主演的《深房I am not alone》勇奪專業組三項大獎。導演吳詠琪奪得「最佳微電影製作」銀獎，Feanna憑出色演技奪得「最佳微電影女主角」金獎，攝影指導趙沛源則奪得「最佳微電影攝影」銀獎。
首次奪得演技獎即摘下女主角金獎的Feanna非常感動，領獎時一度眼濕濕除了感謝導演吳詠琪、公司寰亞、同事以及家人的支持外，更特別感謝客串演出的鄧家杰（Kakit），說：「我好少演感情戲，對住佢冇咁緊張，同埋少女心爆滿，多謝Kakit。」
Feanna之後受訪時指，獎項為她在演戲路上打下強心針：「開頭唔敢相信，知道咗呢個咁好嘅消息，真係好開心，演戲方面相信自己多咗。」她於戲中飾演一位沉溺分手傷痛，還遭受鄰居噪音困擾的女生，情緒低落且沉鬱，對於可愛女孩Feanna來說，絕對是一大挑戰。她說：「平時好少將呢面展露畀朋友睇，喊都好少喺人面前喊，今次係好大突破。我媽咪同我講，『你喺戲入面好恐怖。』我覺得係讚賞，可以令你覺得我恐怖，對我嚟講即係成功。」
《深房》邀請了著名戲劇導師邵美君客串，Feanna亦於拍攝前特意跟對方學戲，她直言獲益良多：「我未試過上演戲班，對我嚟講就好似心靈療癒。我喺《深房》入面係整到成身傷晒，有好多戲劇練習要做，好記得我第一次係唔敢面對自己，但拍攝嗰時就夠膽面對自己。」
Feanna亦因為《深房》第一次參與作曲。微電影的主題曲《I am All Alone》由她主唱，作曲部分亦有她的參與。Feanna透露：「其中一位評審問導演，女主角會唔會試下作歌，就係呢句激起咗我嘅鬥心。」Feanna隨即邀請音樂人兼好友SHIMICA一同創作歌曲，她笑言過程開心好玩，又能將個人情感投放在作品上，還預告未來會多嘗試作曲。
奪得「最佳微電影製作」銀獎的吳詠琪指，由Feanna十幾歲合作至今，看著她成長：「今次佢付出咗好多，好用心上堂、練習，去演好呢個角色。成個團隊見證Feanna拎走咗妹妹嘅感覺，變咗一個女人，希望有更多合作同見到你有更多突破。」Feanna聽後十分感動，坦言對方就如自己的啟蒙老師一樣。吳詠琪提議下次拍殭屍片，Feanna大叫好玩很想參與。@
------------------
⏪️ 回顧2024專題報道👇🏻
https://hk.epochtimes.com/tag/回顧2024
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
