Jay Fung新碟《IN GOOD TIME》下周推出

「唱作王子」Jay Fung馮允謙新碟《IN GOOD TIME》將於下周一（18日）推出，但Jay急不及待日前在戲曲中心茶館舉行新碟分享會，並興奮地為在場Fans演唱碟內全部歌曲，包括從未曝光的《在最好的時間做最好的你》和《給你幸福所以幸福》英文版《You are my everything》。

新碟分享會上，Jay邀請新碟創作團隊T-Ma馬敬恆、陳考威和周錫漢，上台分享創作經過。主持人「飛機」問陳考威和T-Ma，如何與Jay做歌時夾到好氣氛，順利完成？Jay突然自爆：「聽晒我話，咁我就easy going（好易話為）！」兩位嘉賓立即爆笑點頭，平時順得人的Jay原來在錄音室霸氣急升，反差萌引起全場笑聲。完場後「寵粉Jay」更逐一跟歌迷合照。他說：「好開心，每年年尾係我最鍾意嘅聖誕節，又可以出碟，今晚有好多Fans、好朋友、音樂伙伴嚟試聽音樂會，好感恩。」

Jay又透露，日前因練歌一度太投入而感動流淚：「《在最好的時間做最好的你》係成隻碟嘅主題，噚日練歌嘅時候，我一唱完就喊。當時我幻想見到十年前嘅Jay，呢段時間經歷咗好多事，每次聽呢首歌都好大感覺。」他說希望大家把握機會、把握時間，做最好的自己。

新碟內收錄了一首英文歌《You are my everything》，原來是婚禮熱門歌《給你幸福所以幸福》的原形，Jay指起初並不是想寫結婚歌的：「最初寫Demo時用英文填詞，一心諗住出英文歌，無諗有廣東話詞，後來出咗廣東話版本好受歡迎，好多謝大家咁鍾意。依家收錄喺碟嘅英文版本，係我原本嘅諗法和訊息。」@