商台節目主持麻利（鄧慧妍）21日在個人社交平台FB發長文，詳細敘述自己中咗Omicron後過程，以上下兩集，分享自己由發冷、發燒、冇胃口，到退燒、低燒、喉嚨痛、咳嗽、多痰等症狀反覆過程。以親身經歷，否定某些教條無腦說教和條文規定，她強調：「我覺得呢個病，贏係贏在個腦；輸？輸在冇人肯用下腦。」

冇嘢比休息更重要

「我居然都中咗Omicron！瀨咗嘢！」麻利開篇就坦言自己中咗招。但又詼諧解釋並自問：「不過一街都係，已經好平常了？」

接著，她聲明一直未有講的原因：「係因為我真係瞓好多，冇嘢比休息更重要，瞓到好似入咗時間艙咁，出返嚟個天已經有飛碟周圍飛嗰種，不分日夜同年代去瞓。」

之後她坦言，「對住個世界冇咩想講，已經搞成咁仲有咩好講。」

她表示，未親身經歷的人是無資格教導別人如何做的。「我冇可能坐响度乜都冇經歷但去叫人冷靜啲、放鬆啲，自己冇經過苦難嗰啲人就唔好出嚟講呢講路嘞。」

病徵明顯大幅度上落

她說，整個過程中，冇打過針、冇食過Panadol，但有選擇用中藥、有調頻TimeWaver（時間波浪儀）。

她說一向留意自己的身體，但是那天晚上，病徵卻突如其來，「病徵嗰一下係由零去到五十咁明顯，我不嬲留意自己身體，嗰個傍晚突然覺得啲骨好散，少少頭痛。」

「晚上就精彩啦，好醒目十一點鐘上床瞓，跟住嚴重發冷……發冷四小時轉為發高燒……全身好痛，典型重感冒會有嘅皮膚、頭皮赤痛，非常之敏感地痛。」她說，好不容易捱到天光，第二天打俾中醫斷症。

醫過很多個案的中醫指，病症起起落落大同小異。麻利說探熱後，體溫徘徊38.5左右，「呢日冇記憶，冇食過嘢亦冇興趣、冇需要食。全日响張床度，冇沖涼冇洗面冇郁過。長期接力用timewaver home以及用醫療級吸氫氣機，有效快速放鬆瞓覺同埋減低嗰種感冒式頭痛。」

發燒、冇胃口、退燒、 低燒、喉嚨痛

她說，之後繼續低燒、頭痛、周身骨痛、皮膚痛，味覺同苦茶般苦，唯一想食士多啤梨、檸檬、橙等。好在家中有一盤士多啤梨分兩次食（全日只食咗呢個），之後夜晚突然有精神去沖涼。

「一瞓醒全身汗，喉嚨超級痛。退燒就出到汗。但亦因為退燒，我都估到今日快速測試應該顯示positive（個個都係咁講）」她說，連日一直俾人追問檢測結果。

「我覺得大家唔好迷戀一個檢測答案。有病嘅人要自己坦白面對身體有唔妥，而唔係望住一條線兩條線嚟決定做乜。仲有。就算你positive，醫生都係斷症下藥（in my case it' s中醫）點發熱、點發冷、點痛，全部都有關，但同你『被法定乜乜機構話你陽性定陰性』無關。」

「come on，醫病係醫個人唔係醫兩條線。」

輸在冇人肯用腦 醒未呀大家

她披露，期間，有人不停叫她出街檢測，「我喎！燒緊啦喎！行走中的Omicron啦喎！仲出街？自問冇力揸車，即係走去坐車？咁我點確保我冇傳染俾人嘅危險？」她直言「去到呢度我覺得呢個病贏係贏在個腦。輸？輸在冇人肯用下腦。」

她又提到好多公司要求員工有官方證明確診先會唔扣假之類，搞到人人急住出街抵住病要排隊檢測，否則又話你曠工，「呢啲公司、呢啲話事人，同香港一樣！病到忽咗！醒未呀大家！」

點解要歌頌「病都返工」？

她表示，明白很多人不肯留屋企係驚搞到屋企人。其實要互相幫助、互相教育，知道「病毒」係一個咩概念。

此外，她認為，如果要强檢感冒，香港長期有大量人口處於感冒狀態，「呢刻我甚至反省點解要歌頌『病都返工』嘅同事？每種感冒都係病毒嚟，有病應該好返先出街係常識。原來係常識。病毒同細菌係兩件事，唔知到今日有幾多人分得清呢。」

喉嚨俾𠝹刀𠝹傷咗咁痛

麻利長文分上下集詳述自己中招過程及心路歷程，還有對一些謬誤概念的清晰理解過程。

在她明顯感覺自己退燒后應該陽轉陰性的時候，她卻開始了另一個階段的痛苦：「依然喉嚨痛得好緊要！！！平時重感冒喉嚨痛係火燒感覺，但Omicron嘅喉嚨痛係你喉嚨俾𠝹刀𠝹傷咗咁痛，每吞一次口水就翻𠝹一次。係刀傷鋒利劇痛。」

但此時，她卻有了想食嘢嘅衝動，但也只係衝動，因為好易攰。她認為，病毒品性濕寒，萬萬不能亂食嘢。

吃了些通心粉，之後又係瞓覺，「嗰種一挨落床舒服即刻飄走嘅感覺相當良好。」

醫呢個病係用智慧

她說她的中醫講有同事响博覽館幫手但中咗招。中咗之後，作為中醫卻冇得揀用返中藥，而食飯亦要食派發的咖喱雞或牛。麻利大惑不解：呢啲又多汁、辣、油淋淋嘅食物給中咗的病人食，不是會食到所有人咳到久病不癒呢？

「我想知邊個高手負責安排呢啲嘢，有冇少少良心？病人喎？食咖喱？再一次感受到醫呢個病係用智慧，唔好講其他嘢。」

總結整個中招過程，麻利分享經驗：應付Omicron需要嘅係冷靜，focus on自己同身邊人，唔一定要食好多嘢、聆聽自己需要，瞓覺、瞓覺、瞓覺，熱檸檬水、維他命B/C/D/Zinc。

最後，她表示，在這樣的天氣裏，希望所有人同動物都可以保持温暖而乾爽，望大家保重身體。◇

------------------

💎成為會員 📧訂閱電子報
https://hk.epochtimes.com/subscribe

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand