第3度出戰奧運的香港體操代表石偉雄日前於奧運跳馬項目初賽止步，他今日（29日）在社交網站帖文，感謝家人、教練和醫生一直的支持，又透露自己過去兩年多次打止痛針出賽，對自己的表現感到無悔，他又表示最感謝自己一直對體操運動不離不棄。
石偉雄周一在社交網站Instagram發文，分享自己對今屆奧運的參賽感受，以及感謝所有支持他的人：「今次成績雖然未如理想，但係我做到自己需要做到既（嘅）本分，做到享受呢個舞台，做到平常心完全冇壓力咁去比賽，我對得住自己，珍惜每一日仲可以練習同比賽既（嘅）機會。」
「由上屆東京奧運，要決定喺巴黎見大家，我做到啦，我好感恩可以第三次去奧運，好感恩呢三年陪我一齊癲嘅教練（佢而家都係總教練），裁判，治療師、醫生，屋企人，每一位幫過我既（嘅）人，好感恩喺我背後默默支持我陪住我經歷高低起跌既（嘅）嘅香港市民」
石偉雄又透露，近年一直帶傷參賽，甚至連家人亦不知情：「呢三年既（嘅）路已經唔可以用崎嶇黎形容，要去世錦同奧運，一定要用世界盃拎積分黎拎資格，所以由22年頭開始我兩隻腳一直有傷都好都唔可以休息，特別係由上年世錦拎唔到資格後，我即刻做左（咗）個腰手術，我同醫生講唔好話比屋企人知，我自己一個人出入醫院就得嫁啦。」
他又透露今年初的4站世界盃期間，曾經因腳傷而即日回港打止痛針，當時醫生曾經警告他可能會有斷腳的風險。「石仔」當時向醫生表示為了爭取奧運資格，堅定地告訴醫生「我不怕」，他表示不希望到最後一刻才放棄，寧願斷腳亦不想在幾十年後回看自己的一生時，才後悔為甚麼當初沒有「行多步」。
石偉雄的醫生亦在奧運比賽前專程飛到法國，再為他施打止痛針，讓他可以在沒有顧慮之下出賽，他形容對今次比賽成績無悔無憾。石仔又透露，出發前曾經問他的兩位治療師能否到法國觀賽，兩人隨即答應，並放下手上的工作到法國支持他，石仔對兩人表示感謝。
石偉雄在最後表示，最需要感謝的，是自己一直沒有放棄：「真係太多人要多謝同感激，多謝每一位幫過我既（嘅）人，我呢一世都會記得，多謝你地飛過黎睇我又好，睇電視支持我又好，比完賽我收到每一位行過路過市民都講聲respect, proud of you,呢樣係我最想見到既（嘅），多謝你地（哋）支持我，留意香港體操呢個運動，留意香港既運動員，感恩。最後我呢26年既（嘅）體操生涯從來都冇多謝過我自己，多謝你26年既（嘅）堅持同努力，艱難左（咗）26年都冇放棄，當我有78歲命，你堅持左1/3你既生命日復日年復年咁做，石仔多謝你。」@
------------------
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
