歐洲呢個星期四就開會，大家都期望落劑重藥谷一谷，但係歐元開會前見底企穩，點都唔似會開大個水喉放水，無理由無人收到風沽定歐元先。德國IFO商業景氣指數同商業預期指數都差於預期，加上多項數據近幾個月都走低，某程度上支持歐央行進一步量寬。睇下面個圖就會發現連債價都只係升少少，更唔似大手筆放水，預期失落又唔知要跌多少。
老美GDP增長穩定，重可以算係好過預期；剛公佈非農又超靚仔加上失業率長期處於偏低水平，乜有利加息條件都出晒，前費城聯儲主席重話應該加0.5%，真係想人死咁款。但係諗深一層，耶阿姨無理由加完息話咁快就放軟手腳，咁即係自己打自己兩巴，重記唔記得之前佢話過老美身為負責任大國，加唔加息除左睇自己經濟表現，重會照顧其它國家感受。咁就出事，呢個星期新興市場就全面反彈，即係話頂得住加息；商品價格又大幅抽上去，容乜易通脹出現，睇落要耶阿姨唔加息好似真係無理由。香港就升升跌跌，但恆指期權19000 short put平左倉，應該無乜大升機會，因為重有大手2000 short call未走；反而國指要小心，期權7000 short call點都唔走，重要開埋8400 long put，應該點都要再跌一輪。阿爺出口數據跌兩成，創七年最大跌幅（七年前咪09年頭，金融海嘯剛剛爆呔）；出口急跌主要由於人仔升值，實體經濟又欠支撐，睇下個個都去炒樓。
呢期隻主角安全貨倉237，集團主要經營貨倉同地產投資，之前賣得成柴灣貨倉後（折合股東應佔權益每股約13元）手上大把cash，而家得翻觀塘振萬廣場（連101個車位）同國瑞路安全貨倉，估計呢兩件貨大約值33億（折合股東應佔權益每股約25元），扣除相關物業減值，兩邊加埋每股點都值30元。加上集團近幾年開支又唔大，無特別錢要用，差唔多每年經營溢利都派晒俾股東，所以一公佈賣左柴灣貨倉股價就彈升兩成幾，各方友好都估計會派特別股息，唔係點都唔會咁癲。睇翻2010年當時保留過一筆資金打算重建國瑞路安全貨倉，點知城規會唔批，集團2011年尾就將筆錢當特別股息派翻俾股東，證明集團唔喜歡留太多cash在手，偏向派息，股息年年有兼夾高，吸引一班好息之徒捧場，單股價呢幾年就升成10倍，真正財息兼收。大股東一月中重夠膽每股作價18.62場外增持300萬股（大老闆都唔覺貴，肯定有後著）。由於創辦人舊年仙逝，家族成員好大可能賣貨倉派高息分家產，呢種動作唔新鮮，近年就有創興銀行做例。如果無估錯，四月中會開始越升越有，到六月派全年成績表時公佈派特別股息。預計目標價24元。
下星期講隻永嘉集團3322。
讀者有任何交流的，可以發電郵至 fundsniper@yeah.net，大家多作交流。（以上觀點僅為個人對市場的看法，並非任何投資勸誘或建議）⃟◇
------------------
🏵️《九評》20周年👉🏻 https://hk.epochtimes.com/category/專題/退黨大潮
💎成為會員 📧訂閱電子報
https://hk.epochtimes.com/subscribe
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
