羅冠聰、許智峯、張崑陽、梁頌恒、劉康、Aurora、鄭俠、周豎峰、李軒朗……一個個大家或熟悉或陌生的名字，在2020年7.1前後至今，一個一個離開《港區國安法》陰霾下的香港，相繼流亡遙遠的他方。
2020年12月初，英國駐港澳總領事賀恩德接受傳媒訪問時指出，預計未來五年會有多達30多萬港人移民英國；法國國際廣播電台在21年2月21日引述香港政府統計局的數字表示，去年移民他方的港人有近五萬人，比1990年因中國「六四事件」後引發的移民潮更嚴重，當年的移民人數只是23,700人。
今天，相信仍有無數家庭張羅逃亡他方之際，卻也有不少香港人選擇留守香港，靜待風雲變，森哥（化名）是其中一個。對於國安法帶來的白色恐怖，森哥只能與香港人共勉：「大家一起捱囉！」
經歷大躍進運動 四兩米一日的艱難日子
74歲的森哥無論去到哪，頭上總戴著一頂時尚的帽子，中等身材，說話鏗鏘有力。記憶力驚人的他，幼時的經歷、記憶娓娓道來，從跟隨家人在廣東省走水貨、在深圳定居、走難來香港等等的日子，依然清晰、細緻，並未因為年月的沖洗而有所淡忘。
森哥是潮洲人，1949年，當時三歲的森哥，和母親、姐姐從潮洲老家到澳門、中山、香港、深圳各地走水貨為生，販運魷魚、火柴等食物、生活雜貨，透過各地的物價差價賺錢，不久在深圳定居下來。因為深圳毗鄰香港，四通八達，適宜經商。
由於家族以經商為生，所以森哥一家日子過得殷實，惜好景不常，隨著「新中國」建立，關口封閉，他們沒辦法再自由做生意買賣， 加上各種風風火火的運動連年不停上演，令到他們的生計大受影響。1958年，人民公社化運動、大躍進先後展開，情況更是惡化。所謂人民公社，就是將衣、食、住、行都歸公社控制、管理，共享「大鑊飯」；而為了提高農業產量、工業產量，以便「超英趕美」，中共又推動大躍進運動，全國各地以土法煉鋼、各地虛報糧食產量，大量資源遭到浪費，結果到了年尾時各地開始相繼出現大饑荒。
「大陸那啲浮誇由那時開始嚟，咁咪將所有有鐵那啲呢全部拆，包括我屋企窗口啲鐵啊、啲鑊啊，都要收咗去，炒野食啲鑊都要收咗去，窗口啲鐵都拆X咗佢，真係浮誇到不得了。」
在物資短缺下，柴米油鹽醬醋茶、布料、火柴等一切糧食雜貨都必需嚴格配給，只可以用糧票購買。
「咁咪配給啦，四兩米（一斤十二兩），X你邊夠食嗜，尤其是我地那啲𡃁仔，一日食三碗、四碗嘅。點搞啊。」
在深圳生活，物資比較多，生活仍然很艱難，所以森哥深信在中國其他較貧乏的地區，一定出現很多餓死人的情況：「那陣時，如果識唔到人，無啲特殊渠道有多少少糧食，好多人都餓死。不過深圳就好啲，靠近香港，好多時都有啲野偷偷地入到嚟。我唔知大陸其他地方點，一定死好多人。」 由1958年底出現的大饑荒，一直延續到62年，根據近年學者相繼發佈的研究數字顯示，多達千多萬至四千多萬中國人在大饑荒中餓死。
幸好，年少時的森哥，雖只得十二、三歲，卻懂事、能幹，利用住在近郊之便，到附近河流捉魚，自己在山上開田種菜，又經常到農民收穫完的田地，撿拾各種農作物的「遺珠」，所以未致於會餓死。不過，他們無法解決的最大問題是沒田種米，只能仰賴配給。
「我地食好多米，成日唔夠米食㗎。好在我阿媽對人好好，佢識到一個一起做義務勞動嘅軍隊軍屬嘅家眷，識到一個唔知……都幾高（級）下，唔知營長定團長嘅老婆，成日偷偷地喺佢個軍營擔啲米俾我地。唉，真係好感激佢，如果唔係都餓X死咗。」
逃難到香港的決定 由始至終都是正確的
米糧極其不足，就算有先見之明，早幾年已偷渡到香港的父親等家人寄錢給他們，但有錢也無法購買所需物品。
「咁你咪去黑市度拿（買）囉，黑市都好少啦，有幾多食剩啊，有幾多（個）會夠膽偷出嚟啊，所以那時係好慘啊，生活得好慘……覺得咁辛苦不如……香港呢邊成日叫我地『快啲走啦你地！……走啦，申請出嚟。』」
1959年中秋前幾日，森哥和媽媽終獲批香港單程通行證，一河一橋之隔，兩個截然不同的世界，令他印象十分深刻。
森哥說記得過深圳橋的時候，都很心驚，因為看到中共軍隊的態度，內心是自然真的會害怕，「佢（中共軍隊）唔同而家啲人，凶神惡煞㗎！好鬼惡㗎，講句野都好惡，過橋嘅時候見到佢地，個心好驚。過返嚟（香港）呢條橋，覺得定咗好多，咁細個都有咁嘅感覺。可能佢地嘅文化形成咗佢地個面容或者講野都係咁，令到人驚那隻，可能佢都想有咁嘅效果……係一個唔同嘅對比啊嘛。」
「細那時唔知係咩人啦，唔知係咪關員啦，好明顯嘅對比啊，（大陸）好嚴肅好惡嘅，呢度（香港）好輕鬆有笑容嘅。咁一個人感受到嘅時候，自然個心情隨著兩個環境係有所不同，呢啲係梗㗎啦，尤其是我呢啲咁敏感嘅人添，呵呵呵！嘩……好舒服啊過咗嚟，係咪？」「唔需要話一過咗嚟有好野食、見到好野，咁就覺得舒服。係個氣氛唔同咗，你感受到啦。」
說起小時在深圳「周山跑」摘生果、往山裏斬柴執柴、在河裏捉魚的田園生活，森哥仍然充滿懷念，但懷念歸懷念，森哥明白家人要逃難到香港的決定由始至終都是正確的。
「事實係應該落嚟（香港），大人嘅選擇絕對係正確。我講我呢種小朋友嘅心態，呢度（香港）係同個實際環境唔同。（當時）整個環境係唔適宜喺度生活啊。糧票、米票、火柴，買乜野都要有票嘅，咁點生活？米得四兩，一日四兩㗎咋，你地點食啊？咁就唯有係蒸那時加多啲水囉，唔好味囉，因為剩係得水。當時，我見啲人都係周圍咁去撲米，點撲呢？個個都無，個個都係四兩米，個個都唔夠食，點去撲呢？點去生存呢？咁唯有加啲雜糧，蕃薯薯仔那啲。」
89天安門民運啟發 開始積極參與社運
到了香港沒幾日，在親戚的介紹下，森哥去米鋪打工，送米送火水，擔上六、七層高的大廈送貨，無禮拜無假期，食住皆在米鋪，睡在米袋上，蠻辛苦的。幸好幾個月後，爸爸的朋友介紹他去製衣廠做學師，自此後一直在製衣業拚搏。
據森哥講，60年代中期的香港，並不好景，搵工並不容易。而製衣業冬天旺季，夏天淡季，淡季中有時幾日無工開，對於計件賺錢的製衣工人來說，真是手停口停。好在不景氣只是短暫的日子，到了60年代末期，香港工業起飛，經濟開始急速發展，森哥在自己的努力打拚下，也闖出一片天地，自己開設小型工廠接訂單，90年代甚至到廣東省開廠，賺取一桶一桶的金，過著豐衣足食的生活。
森哥成長的年代，教育不普及，所以他只讀過幾年小學，懂認字。森哥好讀書愛看報紙，來到有出版自由的香港則如魚得水，那年代的《大公》《文匯》可以一看，還有《商報》、《晶報》。一份報紙二、三毫子，對於學師人工只得約30元的森哥來說，絕不便宜，所以和父親輪流買，一起睇。1959年代出版的《明報》，對森哥更是影響甚深。
「因為明報那時有浮屍落嚟香港（的報道），同埋佢（明報）對於大躍進啊、毛澤東政策好有批判性，社論裏邊……（我）每一日都會睇金庸寫嘅社論，寫得……那陣時佢思想好開明、觀察力好好，因為佢係內中人，知道共產黨啲野，所以寫得好……個分析令到我好信服，影響我好大，都寫得相當唔錯。」
據森哥所講，那時的報紙，除了《大公》《文匯》、《明報》用公曆外，其他報紙大都是以中華民國作年紀。
雖然森哥關心社會時事，但一直忙於經商賺錢，很少親身參與，直到1989年天安門民運爆發，改變了他的心態。
「那陣時我覺得香港人……那一刻啲群眾，同我以前（認識）那種香港人……搵食、個個都掛住搵食……突然間會咁受感動呢？嗜係大家都會出嚟？嘩！真係好感動那一刻真係。由六四開始，我已經好投入社運㗎啦。」
六四前的五月底，因為中國國內資訊封鎖，森哥就利用自己工廠的傳真機，不停將運動的訊息發到中國。
「人地俾資料俾我地，fax去那度（大陸），咁就將我地香港嘅資訊，將大陸啲X街野呢，佢地收唔到，要由外宣傳入去，fax上去。我叫寫字樓個女仔專同我做呢個，搞到個機都發熱，燒埋添，拉尾仲買過第二部。」
那時，普通工人一個月薪7,000、8,000元，一部傳真機大約6,000元，不可說不貴。不過為了當時的中國民眾能收到相關的訊息，燒了傳真機森哥也不覺得可惜。
六四後對中共死心 更關心香港社會
六四那夜，軍隊開進天安門廣場，血腥屠殺民眾，令森哥悲憤難忘。
「我地喺電視裏邊通宵都睇（新聞報道），睇到喊啊。唉！睇到啲群眾，好感動㗎，那一刻令我印象好深，中咗彈果啲人，人地拿木頭車咁推推推，推佢走。當時香港都未見到那啲話人命傷亡，到見到啲人命傷亡嘅時候，真係好痛心啊。啲槍炮係咁開，啲坦克係咁開過來，槍聲啪啪啪。你睇住那啲人…係咁…啲群眾…其實我地香港（睇覺得）仲大鑊過你，睇個血腥場面，（在）香港（睇）仲大鑊。那時係咁震撼，真係第一次。睇到啲人受傷流哂血，喺㗎車度，啲人係咁搏命推佢走，睇到喊！」
六四翌日，森哥在自己的工廠，掛起一條黑色的長幡，以示悼念。
六四，亦令森哥認識中共屠夫政權的本質，自此後不再有寄望，也令他更關心香港社會。
「六四都影響我好大啊，對共產黨徹底失望。之前對共產黨都仲希望佢好，自從六四之後，真係對佢死咗心。我就由那一刻開始……比以前關心咗呢個社會，關心香港……以前我係搵食做生意，就（算）睇到（社運）都做唔到……唔會將那心投入去、泵咁多心落去，但經歷咗六四之後，覺得呢樣野係影響我地好大嘅，那領導做咗錯誤決定，原來有咁多人受影響嘅，無形中個心係會關心多啲。」
自此後，森哥開始積極參加香港的社運抗爭行動，64、71等等，從不缺席。2012年，黃之鋒倡導的「反國教」運動爆發，年輕人的勇氣及智慧，再度激發森哥的抗爭之心。
「其實真正令到自己成那人變化係之鋒果壇野（2012年反國教）影響我，因為那陣時佢得14歲（*應為16歲），咁細個、咁叻咁醒目，知道呢樣野荼毒我下一代，我好欣賞佢。（我）好欣賞呢個小朋友，開始留意佢，咁佢去擺街站我都有出去望下，一個咁奀咁瘦嘅小朋友，點解咁叻，咁有醒覺性，佢唔係由大陸落嚟嘅，香港土生土長。亦都係呢個問題（國教），覺得好贊同，國教就荼毒我地下一代，我地應該要反抗。」
不再逃難 留守香港：大家一起捱囉
人生七十古來稀，已踏入74歲之齡的森哥，在香港成長、拚搏賺錢，生兒育女，到今天三代同堂，經歷香港的困境、發展、繁榮富庶，直到今天的制度崩壞、墮落，令他痛心、憤怒不已。
「（香港）由貧到繁榮，到法治的美好，那時有廉政公署，之後香港開始法治清明，成個香港美好，真係⋯⋯我睇到，由窮嘅香港到美好嘅香港，到而家X街嘅香港，見證哂。真係好痛心香港由咁好嘅香港淪落到而家……俾呢班……呢班X幼稚園教我地大學生去做野，呢班幼稚園生，幾X條氣唔順呢，你地識乜X野，喂管我地，我X你老味，幾X唔順。」
從一名只顧賺錢的生意人，變成一位積極參與社運的生意人，森哥深深明白香港人要追求的是甚麼：「唉，咁好嘅香港，睇住俾呢班X街搞到搞X到咁樣，真係好心痛！我地唔使話要榮華富貴，唔一定要食得好好、著得好好，言論自由，人身自由，開開心心就已經夠啦！」
最近，政府刻意打壓阿布泰生活百貨、Chickeeduck，結果引發香港人大排長龍的爆買行動，以示抗議，令森哥感到香港仍有希望。
「都好，而家就見到好多人個心都未死，我覺得香港都有希望！老實講，香港由咁窮，到咁繁榮，到法治咁好，到而家俾班X街搞到咁X街，我希望睇到呢班X街點樣X街，係咁簡單……咁就睇返我地啲後生仔搞返起香港，咁先得㗎嘛。希望返返去香港最美好唧時候，我希望得唧，我希望有生之年睇到！」
59年逃難到香港，雖然不知國安法帶來的嚴酷寒冬何時會盡，森哥不想再移民，選擇留守香港，與香港人共進退：「大家一起捱囉！」◇
------------------
🏵️《九評》20周年
https://hk.epochtimes.com/category/專題/退黨大潮
🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand
