修哥返老還童 夥拍2個小學生去旅行

85歲的胡楓（修哥）早前夥其他3位老友藝人拍攝《4個小生去旅行》後，在全城掀起熱議話題，如今又被網上旅行社睇中，請他跟「繁忙兒童」劉小華及鬼妹仔Maggie Cute齊齊穿上校服去旅行，拍攝新一輯短片《3個小學生去旅行》。令人忍俊不禁的是，這位「超齡小學童」修哥，同兩個調皮搗蛋的小朋友製造出無數笑料。

三位「小學生」連放笑彈

胡楓（修哥）拍攝新一輯短片《3個小學生去旅行》。（Expedia）

行年85歲的修哥，同年齡相差10倍的兩個8歲小童一起拍攝宣傳短片，修哥返老還童般宛如打開籠雀，大哼懷舊金曲，令兩個頑皮「同學仔」撓頭皮唔知佢唱乜歌。至於被攝製隊稱為「華哥」的劉小華，就如華仔上身般不受控，連導演問佢嘢，佢都冇正經回答，而喺度扮哂劉德華嘅招牌眼神、小動作回應，連導演都俾佢激死，但又不得不認為型到殺死人。

話說本地薑劉小華和鬼妹仔Maggie Cute天性童真，等埋位時都不停玩耍，連玩衾棉胎啤牌都嘰嘰喳喳爭論不休, 不過就令大人看到後既開心又喜愛。

最回味蜜月旅行過大海

當修哥被問到最愛甚麼樣的方式去旅行時，他就直言：「梗係去拍嘢，跟攝製隊去啦！會幫我安排好所有行程嘛！」原來修哥最享受出 trip去旅行！唔怪之得連遠在「天邊」的土耳其、西班牙、葡萄牙、俄羅斯、愛沙尼亞、拉脫維亞、立陶宛都能找到修哥的足跡和身影！

（如果不為拍攝，修哥私家旅行會去邊呢？）修哥就透露，原來他平時是一名愛家宅男呢，最遠只去加拿大和英國探仔女。不過講起最經典那趟旅行，修哥則神秘笑言，最回味當然是當年的結婚渡蜜月旅行啦！不過都只係去澳門咋。原來五50年代時乘「大船」過澳門，要3粒鐘！不過早年父輩在中環開古董店的修哥可是名副其實的少東來的，當年過澳門蜜月都低調入住數一數二的國際酒店呢。

修哥更透露，坐飛機去旅行的第一次則獻了給台灣：「當時30多歲，朋友接待去台灣。在啟德機場坐飛機，幾巴閉！」