歐洲大手筆放水超過預期，剛宣佈結果匯價即時腳軟，點知新聞發佈會一開就因為行長一句話無再減息可能，會考慮用其它工具刺激經濟，匯價即時拗腰抽上，前後回左半個鐘唔到，睇落大家對歐洲整體經濟都投信心一票。歐洲近幾年能夠經濟復甦，當中德國貢獻最大，基民聯地方選舉失利，好多人猜測默師奶會因為難民政策引起管治危機，甚至乎連任唔到，若果單論政績，完全搵唔到其他人去代替默師奶，好大可能係險勝需要組成聯合政府。敘利亞停火有效舒緩歐盟在照顧難民潮要面對的財政壓力。北韓細金越玩越開心，又短程導彈又話要先下手為強，重吹可以射到紐約，睇落最後都係無乜料（手上無籌碼，邊有本事硬撼硬），似靠嚇多D。香港就麻煩少少，恒指期權20,000點short call唔走重要呢兩日開埋20,400點long put，照睇就無得升，但呢個禮拜好友出晒力頂住個市，好似想頂到結算咁款，但重有個幾禮拜先夠鐘，我就唔睇好。又輪到耶阿姨出場，大家都話唔會加息，之前樣樣數據都靚仔，就呢幾日先出個數據差翻D，又似有理由唔加息住，呢期講下隻永嘉集團3322，公司主要幫Adidas（目前亦係Adidas全球最大供應商，雙方合作超過20年），Reebok，Umbro同Diadora呢D國際品牌做運動衫，而且中港兩地自己做埋運動服零售；用D-Mop 品牌經營中高檔次時裝零售的同時，更擁有多個日本品牌在某些地區的獨家分銷權。唔似其他生產廠家，近年集團已開始轉移生產線去越南同柬埔寨，不單止有效降低成本，以後重可以受惠TPP（跨太平洋經貿夥伴協定）關稅優惠，在同行業中提高競爭力。集團剛剛發左盈喜，預期截至去年年底為止，全年純利按年增長6.5倍；表面睇係因為出售已關閉廠房的土地使用權，但有一點比較吸引，就係中高檔次時裝零售業務好轉（舊年經濟咁差都有好轉），今年應該表現會更好。值得一提係NIKE早幾年因為Air Jordan波鞋走紅連帶其它服飾業務都受益，公司市值也創高峰；去年Adidas先後推出Ultra Boost同Yeeze兩個熱賣款式，熱捧程度同iPhone無乜分別；本周四開賣萬眾矚目NMD鞋款（量產款都1,000，聽聞限量款接近5,000），國內搞到周三朝早就有人排隊等開賣，真係一鞋難求，NMD同Adidas套裝已經成為潮流icon，fans都以擁有為榮，永嘉自然水漲船高。

股價已經成功守住1.10，加上預期訂單增加，有效控制成本，TPP利好等等，現價可以買入，半年目標價1.65。

讀者有任何交流的，可以發電郵至 fundsniper@yeah.net，大家多作交流。（以上觀點僅為個人對市場的看法，並非任何投資勸誘或建議）

這是本專欄的最後一文。希望能在未來再次見到大家！⃟◇

（編者按：本版文章僅代表專欄作者個人意見，不反映本報立場。）

------------------

💎成為會員 📧訂閱電子報
https://hk.epochtimes.com/subscribe

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand