日本仔一招負利率就搞到成個亞洲頭暈身慶,資金流向美元資產,但好奇怪,美匯指數(唔係美匯)唔點郁(上唔翻100),美股又唔點郁,問題係錢去左邊?唯一解釋係金彈高左壓住美匯,原來係乜都唔買等機會。幾個大孖沙都話沽左港紙同人仔,但係好似無乜動靜(禮拜頭股市急跌唔算),因為匯價無企住弱方兌換,金管局又無話出左手護盤,咁情況只有一個可能,人家重未出手。有數據話新加坡股市俾人大手做空,火燒連環船,好戲在後頭。最近祖國新聞講到好多民工今年提早翻歸過年,唔好諗住老闆賺到錢做好人,實情係無生意,早早放假慳翻D水電費;有D舖重利害,年尾無啦啦唔開門重貼張紙話裝修,年後再見,但又唔寫幾時開,似執笠多D,經濟有幾好心照。企業債係另一問題,單單四大金剛(鋼鐵,水泥,煤炭同有色)總負債就有5.4萬億(官方數據,信不信由你),3成係債券,信託2成,剩低5成俾銀行包尾;企業改革同重組,條數計唔清楚又點重組(銀行壞賬增加算唔算有秩序幫企業削債?)。今年1月頭半個月新增貸款1.7萬億(舊年成個1月連1.5萬億都無),個市咁樣重咁多人借錢?行外人就話D老闆過年要找數,無錢緊係問銀行借,你估銀行唔怕無錢還咩。專業講法就係無左存貸比後,好多表外信貸借勢轉為表內,重有個可能係D老闆好多短債(一年期內)到期,無錢還只好借新還舊,反正就得個殼都好過爛賬;房地產去庫存出新招,兩成首期幫你上車,都賣唔到就可能出埋二按,唔使減價又有人接手,銀行好,發展商好,打工仔就唯有辛苦少少(萬一97翻版,連份工都無埋點算好,同胞買樓都係全副身家,分分鐘重問親戚朋友借D先夠)。香港呢邊就好尷尬,期權個位做得好低,臨過年咁玩法,早幾年就試過開市一個星期跌2,000點,今年悲劇重演?老美議息(26號)當晚,紐交所黃金登記庫存一夜之間俾人提左7噸走,按常理出得倉就短期唔諗住賣(紐約係最大實物黃金交易中心),加上議息聲明放白鴿,小心短期金價見底,美元轉弱累街坊。

講翻隻銀泰商業1833,集團以百貨零售業務為主,目前營運中加上在籌備的大型百貨商場同購物中心大約有三十間(主要分佈在五個省,存在區域性風險)。14年3月阿里巴巴用接近54億港元入股32%股權(當時估值約160億),成為集團大股東;同時設立合資公司,俾集團可以快速有效咁融合線上線下業務,加上西選超市(集團旗下跨境電商平台)投入服務,相比其他競爭對手有明顯優勢;另一優勢係率先在行內做到一個月無理由退貨。集團去年從精簡人手,成本控制同新業務開發上都取得明顯的成效;今年如果能更進一步,再配合阿里線上平台的幫助,就算零售市道不景氣,業績要有較好增長應該唔係問題。公司市值現水平比阿里入股時有接近20%折讓,派息率又維持在偏高水平,接近10倍市盈率,現價5.8可以投機性買入,目標價7元。

下星期講隻嘉里建設683

讀者有任何交流的,可以發電郵至 fundsniper@yeah.net,大家多作交流。( 以上觀點僅為個人對市場的看法,並非任何投資勸誘或建議。)◇