藝人薛家燕（家燕姐）兒子石耀庭與女友陳素怡前日（11日）結婚，在九龍洲際酒店筵開50幾圍宴請親朋好友，不過家燕姐笑稱囝囝邀請的朋友只佔一圍，因為他們周末會再舉行派對與友人慶祝，對於爸爸當晚未有出席婚宴，石耀庭透露會約爸爸食飯慶祝。
結婚禮物豪花幾千萬
仔女長大成家立室是每個父母所期盼，家燕姐獨力湊大3個仔女，終於等到囝囝石耀庭結婚喇，自己榮升做奶奶當然好開心啦。新奶奶家燕姐出手闊綽，豪花幾千萬包括物業、金器送贈一對新人。家燕姐揀選兩對合共幾十萬的龍鳳鈪送給新抱，還送了市值2千萬的西半山豪宅單位作新婚禮物。家燕姐與一對新人受訪時，被追問大批首飾的價值，家燕姐興奮的表示最緊要開心，並沒有留意數字。石耀庭則補充說：「總之係一個好靚嘅數字。」而新娘子被問到身上首飾是否很重時，她笑說：「係有啲重，但都OK嘅。」
婚宴上，新抱與奶奶風頭各不相讓，雙雙鬥閃耀目全場。奶奶與新抱同樣替換5套靚衫出場招呼賓客，新奶奶家燕姐更行頭十足，珠光寶氣，佩戴的翡翠鑽飾、手鈪及戒指盡顯雍容華貴。
兒子成家開心淚不停
被問到全日最感動是哪一刻，家燕姐淚眼說：「今朝佢哋斟茶畀我都已經好感觸，終於等到喇！下午簽字宣讀誓詞時，又再開心到喊，叫自己要控制情緒，不過見到親家喊緊，可能做父母都係咁，對仔女長大成人好有感覺。」家燕姐囑咐兒子要愛錫老婆，大家相處要忍讓。被問到想唔想抱孫，石耀庭即搶答表示想生一、兩個，當下先要努力工作。
其實家燕姐晚宴前已兩度落淚，入席後都多次開心到眼濕濕。當一對新人上台致詞時，新郎哥亦喜極而泣，要太太幫他抹淚，場面溫馨甜蜜。◇
------------------
📰支持大紀元，購買日報：
https://www.epochtimeshk.org/stores
📊InfoG：
https://bit.ly/EpochTimesHK_InfoG
✒️名家專欄：
https://bit.ly/EpochTimesHK_Column
