一直以嚟都冇人話到俾我聽到底北京填鴨、北京烤鴨同片皮鴨有咩分別?!我google過都係搵唔到答案,上星期剛好約咗朋友去北京樓食飯,順便借呢個機會問一下侍應,侍應同我講其實係一樣之後,即刻明晒!

星光行呢間分店好多遊客去食,因為地點方便近尖沙咀碼頭同四周嘅旅遊點,而且呢間店有大大嘅玻璃窗可以望到海景,中午陽光充足望住海景飲住茶好休閒,夜晚重可以睇到幻彩詠香江匯演添!

曾幾何時佢哋嘅烤鴨同松子桂花魚都係主打名菜,我就點返呢兩樣試下同當年有咩分別先!當我坐低嘅時候見到幾乎每一枱都會點一隻北京烤鴨,佢哋嘅烤鴨一隻都唔平,要幾百蚊㗎!烤鴨係推出嚟對住每一枱食客即刻片皮,因為我要先影相所以叫佢先放低,烤鴨都幾大隻望到鴨身唔係全隻脹卜卜,中間有少少凹陷唔夠靚,應該係已經燒完一段短時間所以開始有啲收縮凹陷,不過鴨皮油光充足好脆嘅感覺,每枱食客都可以全程直擊佢片皮再上桌,唔同而家好多酒樓都係喺廚房做好先攞出嚟,當住食客面前切呢個先係傳統嘅做法,賞心悅目亦代表新鮮先可以咁樣做。

鴨身唔係全隻脹卜卜,中間有少少凹陷唔夠靚,應該係已經燒完一段短時間所以開始有啲收縮凹陷
鴨身唔係全隻脹卜卜,中間有少少凹陷唔夠靚,應該係已經燒完一段短時間所以開始有啲收縮凹陷

片皮鴨連配料一上台我就立刻試食,隻鴨唔係好肥唔多肥膏唔錯,每片皮同肉切得比例剛剛好,連青瓜條、蔥條加甜醬用薄餅包好之後就食得,入口皮脆肉嫩有油香但唔油膩,水準雖然不及當年但已經好食過好多酒樓,一隻已經夠三至四個人食重好飽肚。

每枱食客都可以全程直擊佢片皮再上桌,每片皮同肉切得比例剛剛好。
每枱食客都可以全程直擊佢片皮再上桌,每片皮同肉切得比例剛剛好。

片皮鴨連青瓜條、蔥條加甜醬用薄餅包好之後就食得。
片皮鴨連青瓜條、蔥條加甜醬用薄餅包好之後就食得。

之後到我哋叫佢後上嘅松子桂花魚,望到桂花魚炸得乾身脆卜卜唔油,配上酸甜汁酸酸甜甜好開胃,不過松子唔夠多,魚唔大條但係幾新鮮,呢一味菜都係要快食,凍咗酸甜汁就會變得杰身,漿住唔好食㗎喇!

魚唔大條但係幾新鮮,炸得乾身脆卜卜唔油。
魚唔大條但係幾新鮮,炸得乾身脆卜卜唔油。
松子桂花魚配上酸甜汁酸酸甜甜好開胃,不過松子唔夠多。
松子桂花魚配上酸甜汁酸酸甜甜好開胃,不過松子唔夠多。

松子桂花魚要快食,凍咗酸甜汁就會變得杰身,漿住唔好食㗎喇。
松子桂花魚要快食,凍咗酸甜汁就會變得杰身,漿住唔好食㗎喇。

其實食完隻鴨已經飽咗七成,食唔晒仲要打包走增添!松子魚好彩唔係好大條先食得晒,奉勸大家去食嘅話最起碼四個人咁就剛剛好,如果要坐窗口位睇海景就要早一個星期前book定位了。◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com