呢間喺沙田第一城嘅娜多歐陸餐廳我平時經常光顧,首先佢地點方便,搭馬鐵喺第一城站出去行幾分鐘就到,其次佢環境幾舒服夠光猛,坐位多又有卡位,仲有半開放式嘅㕑房睇到佢整麵包同焗pizza嘅過程,成間餐廳嘅麵包同pizza都係自家製㗎!佢早餐同下午茶仲超抵,而重點係食物真係好食,平時嘅早餐三十幾蚊已經有交易仲包咗好多嘢食。不過今次我帶朋友下午茶時段去,所以推介畀大家嘅係下午茶套餐。

佢嘅下午茶餐雖然係平民價錢,但係食物賣相同味道一啲都唔馬虎,份量亦好足!我叫咗個二人餐再加兩個tea specials,二人餐可以揀一款傳統薄餅,加一款焗飯或意粉,再加一款小食,包兩杯餐飲。我點咗芝士達人薄餅、鮮茄芝士焗豬扒飯同埋意式香辣雞中翼。Tea specials我點咗一口魚柳拼炸薯角、另一個係黑松露野菌白汁意粉,餐飲我哋全部要即磨咖啡,因為佢哋嘅即磨咖啡夠香滑。

黑松露野菌白汁意粉下午茶份量同正常時段一樣,真係好抵食呀!意粉入口有黑松露嘅香味再加香滑嘅白汁,冇偷工減料㗎!而且味道絕對唔輸蝕比中價嘅西餐廳。一口魚柳炸得香脆唔會有雪味,炸薯角就比較薄身咬落去薯蓉唔夠多。意式香辣雞中翼冇辣味,佢配嗰個其實係甜酸醬,而唔係辣醬,所以唔辣。鮮茄芝士焗豬扒飯真係用鮮茄,而唔係就咁用茄汁茄膏就算,豬扒軟腍。跟住就梗係萬眾期待嘅即製pizza——芝士達人薄餅啦~呢個芝士達人薄餅有三種芝士(車打芝士、馬蘇里拉芝士、巴馬臣芝士),好似我呢類咩芝士都鍾意嘅芝士控真係啱晒呀!薄餅一上枱香噴噴,焗得金黃香脆,入口外脆內軟,幾種芝士香混合加埋番茄菠蘿,真係滋味好食到冇嘢講!

黑松露野菌白汁意粉
黑松露野菌白汁意粉

 

經典鮮茄芝士焗豬扒飯
經典鮮茄芝士焗豬扒飯

意式香辣雞中翼
意式香辣雞中翼

一口魚柳拼炸薯條
一口魚柳拼炸薯條

 

我喺一開頭講到下午茶係超抵,到底點樣抵法呢?最抵最抵係黑松露野菌白汁意粉,只係32蚊,咁平仲要有咁嘅質素真係去邊到搵,二人餐係138蚊,都好抵㗎!如果你慨嘆而家香港百物騰貴,去茶餐廳食個下午茶餐都要幾十蚊嘅時候,試試呢一間包你悶氣全消!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com