上星期五同一個好鍾意食芝士嘅朋友食飯,但係西餐又食到悶悶哋,我帶佢去咗呢間位於沙田嘅台式餐廳,平時lunch同夜晚時間都好爆場排長龍㗎!我哋兩點幾去到,剛好佢下午茶時段之餘人又唔多。佢嘅下午茶餐好抵食,叫餐牌裏面嘅食物,只需加8蚊就有杯飲品,特飲都只係加18蚊!

坐低叫咗必食嘅溶岩芝士雞,熱辣辣脆卜卜嘅農夫包裏面裝滿好似岩漿一樣嘅半溶芝士,將件雞蘸落芝士度再拉起會拉出好長好多嘅芝士,睇見都興奮。熱辣辣岩漿咁多嘅芝士配上脆嫩嘅炸雞,好味到唔停得口。食完炸雞最後成個農夫包連剩餘嘅芝士都食埋,一啲都唔嘥。

熔岩芝士雞
熔岩芝士雞

仲有佢嘅綜合水果茶,水果茶係正宗台式,裏面除咗有水果仲放有一粒話梅,而最特別嘅係佢會附上一粒裏面都有水果嘅冰塊。

綜合水果茶
綜合水果茶
 

綜合水果茶
綜合水果茶

跟住我再叫咗一份鹽酥雞、維多利亞的秘密、同埋一個阿春麵線配海山炸豆腐下午茶餐,餐飲就點咗一杯凍珍珠奶茶(微糖少冰)。鹽酥雞跟有六款味粉可隨意添加,我比較鍾意紫菜加咖哩味,朋友話梅子都唔錯,芝士就好甜麻麻地,香辣我冇試因為我唔食得辣,原味即係淮鹽。

鹽酥雞
鹽酥雞

阿春麵線味道都唔錯,相比喺台灣食到好杰身、好重口味、好多味精嘅,明顯冇咁濃冇咁杰,比較適合香港人口味,我鍾意呀!炸豆腐好香脆唔油膩。

阿春麵線
阿春麵線

阿春麵線
阿春麵線

海山炸豆腐
海山炸豆腐

維多利亞的秘密其實就係雜莓乳酪沙冰,呢個真係好好飲,沙冰上面嘅生果都係雪到冰硬入口好似雪糕咁,又大杯,咁啱呢幾日氣溫回升天氣都幾熱,飲佢真係超冰涼又解渴。呢間提供嘅台式飲品非常貼心,可以任選甜度同冰嘅份量,珍珠奶茶我叫咗少甜少冰。珍珠奶茶入口幾有茶味真係少甜,唔錯!但係珍珠一咬就碎好粉,完全冇一般珍珠嘅煙韌彈牙口感而且勁甜,最終只係飲曬杯奶茶淨番所有珍珠。

維多利亞的秘密
維多利亞的秘密

珍珠奶茶
珍珠奶茶

我知道大家最關心嘅梗係價錢啦!由於下午茶時段免加一,而且飲品又有特價,就算食咁多嘢埋單都只係二百幾蚊,係咪好介紹先?!以後大家經過沙田又多一個好選擇喇!◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com